काठमाडौ, मंसिर १४
राष्ट्रिय स्वतन्त्र पार्टीका सभापति रवि लामिछाने अझै तीन दिनसम्म काठमाडौं हिरासतमा रहने हुनु भएको छ ।
बिहीबार साँझ पोखराबाट काठमाडौं ल्याईएका लामिछानेको बयान नसकिएकाले कम्तीमा आइतबारसम्म काठमाडौंमै रहने हुनुभएको हो ।
आज बिहानदेखि सुरू बयान अपराह्न ३ः३० बजे सकिएको थियो । आज उहाँले करिब साढे ६ घण्टा लामो बयान दिनुभएको बताइएको छ ।
हिजो काठमाडौं ल्याइएका उहाँको आजबाट बयान सुरू भएको हो। जिल्ला सहकारी वकिलको कार्यालयमा बिहान ९ बजेदेखि भएको बयान दिउँसो ३ः३० बजे सकिएको जनाइएको छ।
अब उहाँको बाँकी बयान आइतबार हुने छ। उहाँ सहकारी ठगीको मुद्दामा कास्की प्रहरी हिरासतमा रहनुभएको थियो । काठमाडौं कालीमाटीको स्वणर्लक्ष्मी सहकारी ठगीको आरोपमा लामिछानेलाई बयान लिन काठमाडौं ल्याइएको हो।
स्वणर्लक्ष्मी सहकारीबाट जिबी राई र रविले लाखौँ रकम लिएको प्रमाण भेटिएको छ । बुझिलिनेको हस्ताक्षर नभएका र सहकारीको छाप नभएका दुई कागजात फेला परेका छन्।
त्यसमा स्वणर्लक्ष्मी चार पांग्रे सवारी कर्जा भनी ४६ लाख ४८ हजार र ४६ लाख ९८ हजार रुपैयाँ ऋण लिएको उल्लेख छ। त्यसरी लिइएको रकम गोर्खा मिडिया नेट्वर्कमा लगानी गरेको आरोप उहाँहरूलाई छ।
यसअघि उहाँका साझेदार पूर्वडीआईजी छविलाल जोशीसँग बयान लिइएको थियो। स्वणर्लक्ष्मी सहकारी ठगीको पूरक जाहेरी अहिले जिल्ला प्रहरी परिसर काठमाडौंमा छ।
