दमकको आकर्षक बिजनेस टावरको आज प्रम ओलीबाट उद्घाटन हुँदै

दमक, मंसिर २३
नेपालकै अग्लो टावरका रुपमा निर्माण भएको झापाको दमक ३ स्थित ‘दमक बिजनेस कम्प्लेक्स’को आज प्रधानमन्त्री केपी शर्र्मा ओलीले उद्घाटन गर्ने कार्यक्रम रहेको छ ।

 

पूर्वपश्चिम मुख्य सडकको ताराबारी उत्तर दमक वडा नं. ३ मा ‘दमक बिजनेस कम्प्लेक्स’ नाम दिइएको १८ तले टावर आकारको भवनको प्रधानमन्त्री ओलीले अपरान्ह २ बजे उद्घाटन गर्ने कार्यक्रम रहेको छ । जसले स्थानीयमा उत्साह ल्याउने भएको देखिन्छ ।

 

सहरी विकास मन्त्रालयले टावरस्थलमा शनिबार पत्रकार सम्मेलन गर्दै यसको सञ्चालनका लागि कम्पनीहरुलाई आव्हान गर्ने तथा केही प्रवेश शुल्क समेत राखेर त्यसको व्यवस्थापन गरिने जानकारी गराएकोे छ । मन्त्रालयका सचिव गोपालप्रसाद सिग्देलले टावर उद्घाटपछि व्यापारिक प्रयोजनको हिसाबले समेत कम्पनीहरुले यसको व्यवसायिक सञ्चालनकालागि साञ्चालनको जिम्मा लिनसक्ने उल्लेख गर्नुभयो ।

 

प्रधामन्त्री ओलीको निर्वाचन क्षेत्र झापा ५ मा पर्ने सो टावर प्रधानमन्त्री ओलीकै पहलमा गौरबको आयोजनाका रुपमा रहेको छ । पूर्वको फरक आकर्षकस्थलका रुपमा लिइएको टावरलाई यसबेला आकर्षकरुपले सजाउने काम भएको छ । टावरकोे वरिपरी पानीका फोहोरा, आकर्षक बत्तीसहितको मनोरमस्थल तयार छ ।
यसलाई ‘दमक भ्यू टावर’को नामबाट निर्माण सुरु भएको र पछि ‘दमक बिजनेस कम्प्लेक्स’ नामाकरण गरिएको थियो । यो टावर १ वर्ष अघि नै निर्माण सम्पन्न भएपनि त्यसको सञ्चालनका सम्बन्धमा संघीय सरकारले नीति बनाउन समय लागेपछि यसबेला उद्घाटन हुने अवसर जुरेको छ ।

 

स्थानीय सरकार वा कुन निकायले सञ्चालन गर्ने भन्ने विषयमा अन्योलता सिर्जना भइरहेको थियो । टावरका विषयमा राजनीति पक्ष र विपक्षका हिसाबले हेर्ने र तर्क गर्ने कुराले पनि ठाउँ पाउँदै आएको थियो । यसबीच यसको स्वामित्व अन्तर्राष्ट्रिय सम्मेलन केन्द्र विकास समितिलाई दिने तयारीसहित उद्घाटन हुन लागेको हो ।

 

केही समय अघि अन्तर्राष्ट्रिय सम्मेलन केन्द्र विकास समितिका कार्यकारी निर्देशक तेजबहादुर राईसहितको टोलीले स्थलगत निरीक्षण गरी यस विषयमा गहन छलफल गरेर अघि बढ्ने प्रतिबद्धता जनाएको थियो । टावरको सञ्चालनको नीति निर्माण सरकारले तय गरेपछि यसखाले गौरबको योजनाले कोशी प्रदेशलाई गौरबको अनुभूति प्रदान गरेकोे कोशी प्रदेशसभा सदस्य होमबहादुर थापाको बुझाई छ ।

 

२०७६ असार २७ गते प्रधानमन्त्री ओलीले यसको शिलान्यास गर्नुभएको थियो । एक सय मिटर अग्लो सो कप्लेक्स १८ तलामा विजाजित छ । ७२ मिटर उचाइ कंक्रिट संरचनामा बनेको छ भने २८ मिटरमा मेटल फ्रेमको टावर रहेको छ ।

 

कुल एक अर्ब ३८ करोड १८ लाख चार हजार पाँच सय ६९ रुपैयाँ लागत लाग्ने सुरुको सम्झौता रहेकोमा परियोजना सम्पन्न हुँदा ५ दशमलव ४ प्रतिशत लागत मूल्य बढेको सहरी विकास तथा भवन निर्माण आयोजना चन्द्रगढीले जनाएको छ । जस अनुरुप यसको लागत एक अर्ब ४५ करोड हुन पुगेको छ । चिनियाँ कम्पनी जेडसीजीआईआईसी र आशिष ओम साइराम निर्माण कम्पनी जेभीले टावर निर्माणको जिम्मा पाएको थियो ।

https://www.facebook.com/share/v/19W1TUP2KL/