इलाम, मंसिर २७
नेपालको चियाको राजधानी मानिने इलामको सूर्योदय नगरस्थित कन्याममा निर्माण भएको नेपालकै पहिलो चिया परीक्षण, प्रवर्द्धन तथा अनुसन्धान केन्द्रको उद्घाटन गरिएको छ ।
कन्याम चियाबगान भित्र निर्माण गरिएको केन्द्रको बिहीबार कोशी प्रदेशका मुख्य मन्त्री हिक्मतकुमार कार्कीले एक कार्यक्रमकाबिच उद्घाटन गर्दै यो कोशी सरकारको गौरबको आयोजना भएको जनाउनु भयो । चियाको बजारीकरणका लागि सो केन्द्र कोसेढुंगा साबित हुने बताउँदै भन्नुभयो, ‘चियामा चौतर्फी समस्या आइरहेको बेला निर्माण भई सञ्चालन भएको केन्द्रले विदेशी वायर ल्याएर सोझै चिया बिक्री गर्न सक्छ । यसबाट हाम्रो आर्थिक उन्नती हुन्छ र नेपालकै पहिचान बढ्छ ।’
राष्ट्रिय चिया तथा कफी विकास बोर्डका निर्देशक डा. दीपक खनालले परीक्षण केन्द्र सञ्चालनका लागि बोर्डले प्राविधिक सहयोग गर्ने उल्लेख गर्दै भारतले नेपाली चिया रोक्ने काम पटक-पटक गर्दा नेपाली चियाको बजार अन्योलमा परेपछि चाइनामा चियाको बजार खोज्ने काम भइरहेको सुनाउनु भयो ।
कोशी प्रदेश सरकार र सूर्योदय नगरपालिकाले आर्थिक वर्ष २०७७ मा सुरु गरेको २१ करोड ६७ लाख नौ हजार पाँच सय २६ रुपैयाँको लगानीमा होटल, सेमिनार हल, क्याफे सहितको चिया परीक्षण केन्द्र निर्माण गरेको हो । केन्द्रमा चिया अनुसन्धानका मेसिन ल्याउन बाँकी रहेको छ ।
