दमक, फागुन ३
झापाको दमक नगरपालिका वडा नम्बर ५ स्थित खुला स्थान । फुटबल खेल्ने आधिकारिक खेल मैदान नभएपनि खुला ठाउँमा यहाँका वयस्कहरु फुटबल खेल्ने अभ्यास गरिरहेका छन् ।
नगर स्तरीय फुटबल प्रतियोगितामा प्रतिस्पर्धा गराउने उद्धेश्यले त्यहाँ फुटबल खेलको अभ्यास भएको हो ।
दमक ५ ले त्यहाँ एकजना कोचनै नियुक्त गरेर बिहान र साँझ गरी दिनमा दुई पटक फुटबलको अभ्यास गराइरहेको वडा सदस्य खड्ग राईले जानकारी दिनुभयो ।
अभ्यास खेलमा बिहानको सत्रमा २० जना खेलाडीहरु सहभागी भएका छन् । बिहान १२ वर्ष भन्दा कम उमेरका बालबालिका सहभागी हुन्छन् भने दिउँसो त्यो भन्दा माथीको उमेर समूहका ३० जना अभ्यासकालागि आउने गरेका छन् । अभ्यासमा आएका प्रशिक्षार्थीहरु जीवन भट्टराई, कृतिका थापा, प्र्रिन्स कार्कीसहितको एउटै भनाई छ ‘वडा कार्यालयले कोचको व्यवस्थानै गरेर फुटबल सिकाउँदा हामीले पनि अभ्यास गरेर केही नयाँ कुरा सिक्ने मौका पाएका छौ ।’
एन्फा कोच बादल माझीलाई तीन महिना सम्मकालागि वडाले नियूक्त गरेको छ । अनुभवी प्रशिक्षक मार्फत फुटबलप्रेमीहरुले त्यहाँ खेल सिक्न पाएका छन् । खासगरी ५ नम्बर वडाले आफ्नो वडामा खेलाडी उत्पादन गर्न यो प्रशिक्षण गराएको भएपनि अन्य वडाबाट पनि इच्छुकहरु सहभागी हुने गरेका छन् । उनीहरुको सकृयता देखेर केही व्यक्ति तथा संस्थाहरुले केही खेल सामग्री पनि हस्तान्तरण गरेर प्रशिक्षार्थीहरुको मनोवल बढाउने काम भइरहेको छ ।
