दमक, चैत ७
य’वाहरुलाई कसरी के के प्राविधिक पक्ष सिकाएर रोजगार बनाउन सकिन्छ भन्नेमा दमक नगरका वडाहरु लागिपरेका छन् । यस अन्तर्गत वडा नम्बर ६ ले य’वाहरुकालागि केश काट्ने ४५ दिने ‘हेयर कटिङ’ तालिम सम्पन्न गरेको छ ।
प्रोफाइल युनिसेक्स सलुन एण्ड एकेडेमीको प्राविधिक सहयोगमा माघ १३ देखि अघि बढेको तालिमको बिहीबार समापन कार्यक्रममा बोल्दै ६ नम्बर वडाअध्यक्ष टेकबहादुर थापाले युवाहरु स्वरोजगार बन्नु तालिमको लक्ष्य रहेको जनाउनु भयो । उहाँले उद्यमी बन्नेहरुकालागि वडाले आर्थिक रुपमा केही सघाउने पनि बताउनु भयो ।
कार्यक्रममा प्रशिक्षक लक्ष्मी शिवाकोटीले तालिममा सिकेको सीपलाई व्यवहारमा उतार्न अनुरोधसहितको शुभकामना व्यक्त गर्नुभयो ।
तालिमका प्रशिक्षार्थीहरुले पनि सिकाई प्रभावकारी भएको र त्यसबाट केही गर्न सक्ने सीप बढेको अनुभव व्यक्त गरेका छन् ।
कार्यक्रममा, तालिममा सहभागिलाई प्रमाणपत्र वितरण गरिएको छ । वडा कार्यालयको १ लाख रुपैयाँ बजेटमा सञ्चालित सो तालिममा ९ जनाको सहभागिता रहेको थियो ।
