दमक, चैत १४ \ अमेरिकी राष्ट्रपति डोनाल्ड ट्रम्पले टिकटक बिक्री प्रक्रिया सुनिश्चित गरे अमेरिकाले चीनमाथि लगाइएको भन्सार शुल्क घटाउन तयार रहेको बताउनु भएको छ ।
ट्रम्पले टिकटक खरिद गर्ने कुनै गैर–चिनियाँ खरिदकर्तालाई खोज्न ५ अप्रिलको समयसीमा लम्ब्याउन आफू तयार रहेको पनि बताएको समाचार संस्था बीबीसीले जनाएको छ । टिकटक चिनियाँ कम्पनी बाइटडान्स स्वामित्वको एप हो ।
यसअघि पूर्व राष्ट्रपति जो बाइडेन प्रशासनअन्तर्गत टिकटकमा प्रतिबन्ध लगाउने एक कानुन पारित भएको थियो । तर, ट्रम्पले सत्ता सम्हालेपछि जनवरीमा त्यसखाले कानुन लागू गर्न ढिलाइ गरिएको थियो । सो कानुन सन् २०२४ मा पारित भएको थियो । राष्ट्रिय सुरक्षालाई आधार मानेर टिकटकलाई किन्ने वा यसमा प्रतिबन्ध लगाउने निर्णय गरिएको थियो ।
