दमक, ५ बैशाख / विगत १० महिनादेखि स्वास्थ्य बीमाको रकम भूक्तानी नहुँदा अस्पतालहरुले विरामी उपचार गर्न आनाकानी गर्न थालेका छन् ।
बीमा बापत १६ अर्ब ४५ रुपैयाँ भुक्तानी गर्न बाँकी रहेको अवस्थामा बीमा बोर्डसँग भुक्तानी बराबर पनि रकम नरहेकाले अर्को समस्या देखिएको छ । सरकारले अस्पताललाई रकम भुक्तानी गर्न नसक्दा स्वास्थ्य बीमाबाट हुँदै आएको उपचारमा नागरिकले समस्या भोग्न थालेका छन् ।
देशभर ४ सय ८५ वटा अस्पताललाई सरकारले स्वास्थ्य बिमामार्फत औषधि उपचार सेवाका लागि रकम भुक्तानी दिँदै आएको छ । तर पछिल्लो १० महिनायता औषधि उपचारमा अस्पतालले भुक्तानी पाउन नसकेकाले बीमा मार्फत अब उपचार गर्न सम्भव नहुने अस्पतालहरुको प्रतिक्रिया आइरहेको छ ।
देशभरका अस्पताललाई १६ अर्ब ४५ करोड रुपैयाँ भुक्तानी गर्न बाँकी रहेको स्वास्थ्य बीमा बोर्डका सूचना अधिकारी विकेश मल्लले जनाउनु भयो । मल्लका अनुसार बीमा बोर्डसँग भुक्तानी बराबर पनि रकम छैन । चालु आर्थिक वर्षको फागुन मसान्तमा बोर्डमा जम्मा एक अर्ब रकम छ भनें भुक्तानी दिनुपर्ने दायित्व भनें १६ अर्ब ४५ करोड पुगिसकेको छ ।
बोर्डको कोषमा आम्दानीका सीमित स्रोत र घाटा बजेट छ । स्वास्थ्य बीमा कोषमा बीमितबाट प्राप्त हुने रकम र नेपाल सरकारबाट प्राप्त हुने रकम मात्र जम्मा हुने गरेको छ । यो रकम उपचार खर्च भुक्तानीमा पर्याप्त नरहेको बोर्डका सूचना अधिकारी मल्लले उल्लेख गर्नुभयो । चालु आर्थिक वर्षमा बोर्डले जम्मा २६ अर्ब ५९ करोडको बजेट स्वीकृत गरेको छ, तर प्राप्त हुने रकम स्वीकृत बजेटको एक तिहाई मात्र हुने देखिन्छ ।
बीमा कार्यक्रम हालसम्म ७७ जिल्लाका ७४९ स्थानीय तहमा विस्तार भएको छ । हालसम्म कुल ८९ लाख ५२ हजार १३५ व्यक्ति यसमा आबद्ध छन् । देशभर ४०४ वटा सरकारी, २३ सामुदायिक र निजी ४८ गरी चार सय ८५ वटा अस्पतालले स्वास्थ्य बिमामार्फत औषधि उपचार सेवा दिँदै आएका छन् ।
आर्थिक वर्ष २०८१/८२ को फागुन मसान्तसम्म क्रियाशील बिमितको संख्या ५७ लाख ५३ हजार ८१७ छ, जुन कुल जनसंख्याको २० प्रतिशत हो ।सामान्य क्रियाशील बिमित ४३ लाख दुई हजार ७०९ अर्थात् कुल बीमितमध्ये ७५ प्रतिशत र क्रियाशील लक्षित बीमित १४ लाख ५१ हजार १०८ अर्थात् २५ प्रतिशत छन् । अझै पनि ८० प्रतिशत नागरिकलाई यसमा समेटनुपर्ने देखिएको छ ।
