दमक, २४ बैशाख / द लिटरेरी सोसाइटी अफ भुटानको चौथो वार्षिक उत्सव दमकस्थित बेलडाँगी शिविरमा सम्पन्न भएको छ ।
सोसाइटीका अध्यक्ष तीलक राईको अध्यक्षता तथा भुटान पिपुल्स पार्टीका अध्यक्ष बलराम पौडेलको प्रमुख आतिथ्यता रहेको कार्यक्रममा नेपाल प्रज्ञा प्रतिष्ठानकी प्राज्ञ सदस्य साहित्यकार सुमित्रा बाङ्देल चेली, शिविर सचिव सञ्चहाङ सुब्बासहितको विशेष आतिथ्यता रहेको थियो । सांगेन पन्धाक, चिरञ्जीवी राई, थिरु घिमिरे, ओम सापकोटासहितले कविता तथा गणेश धिमाल, साराङ्गा सुब्बा, सुदन राईसहितले गीत प्रस्तुत गर्नुभएको थियो ।
सो अवसरमा दियालो वार्षिक पत्रिका अंक ४ पनि सार्वजनिकीकरण भयो । ५ मइ डा. गोविन्द रिजालको स्मृति दिवस समेत परेको सन्दर्भमा दियालोको यो अंक उहाँको विशेष अंकका रुपमा प्रकाशित गरिएको सोसाइटीका उपाध्यक्ष दिल भुटानीले जनाउनु भयो ।
शिविरको कष्टकर बसाई रहेपनि नेपालीभाषी साहित्य, कला र संस्कृति संरक्षणमा भुटानी सर्जकहरुले सोसाइटीमार्फत कार्यक्रम सञ्चालन गरेर देशको माटो बोलिरहेका छन् ।
