दमक, २९ बैशाख / पछिल्लो समय मानिसमा अमनचयन घट्दो छ । नकारात्मक सोचले बढावा पाइरहेको छ । आवेग बढेका कारण समाजमा हरेक दिन अप्रिय घटना हुने गरेका छन् । शहिष्णुता घट्दै जाँदा पारिवारिक बिखण्डन पनि बढ्न थालेको छ ।
यी सबै हुनुमा अहिले मानिसहरुमा नैतिक शिक्षाको अभाव रहेको बुद्धका अनुयायीहरुले बताएका छन् । त्यसैले अव झापाको दमकमा विषेश अभियाननै चलाएर बुद्धका वाणीहरुको प्रचार गरिने भएको छ । दमक ७ मा बुद्ध बिहार स्थापना भएको केही वर्ष भयो ।
यसले बुद्धका वचनहरुलाई कसरी नयाँ पुस्तामा लैजाने भनेर विभिन्न कार्यक्रमहरु गर्दै आएको छ । बुद्धका वाणीहरु जसले मानिसलाई काम गर्न उर्जा बढाउँछ ।
मनमा शान्त भाव स्थापना गराउँछ । सहयोगी र माया जगाउँछ । त्यसखाले शिक्षाको अभाव रहेको भन्दै यस किसिमको शिक्षा अब गाउँ गाउँ र टोल टोलमा गएर प्रचार गर्न आवश्यक रहेको बुद्ध बिहार दमककी अध्यक्ष अञ्जना ताम्राकारले बताउनु भयो ।
बेला बेला बृहत भेला गरी त्यसखाले वाणी सुनाउने कार्यक्रम समेत गरिने योजना रहे पनि त्यसका लागि पर्याप्त भौतिक संरचना नरहेकोले नगरपालिकासँग त्यसको व्यवस्थापन गरिदिन माग समेत गरिएको उहाँले सुनाउनु भयो ।
यस्तै, सोमबार २५६९ औ बुद्ध जयन्तीको अवसरमा दमकमा बृहत शान्ति र्याली समेत गरिएको थियो । दमक चोक र बजारको परिक्रमा गर्दै र्यालीमा ओम माने पेमे : को धुनले गुञ्जायमान गराइएको थियो ।
शान्ति र्यालीपछि बोल्दै दावा गेल्छिनले मान्छेले मान्छेलाई चिन्न नसकेर र त्यसको महत्व नबुझेर पनि आत्महत्या तथा अन्य हिंसाजन्य कार्यमा संलग्न हुने गरेको उल्लेख गर्नु भयो । उहाँले मान्छेलाई मान्छेको पहिचान र त्यसको महत्वबारे सिकाउन पनि बुद्धका वाणीहरु सुन्नै पर्ने उल्लेख गर्नु भयो ।
बिभिन्न कार्यक्रम गरी देश तथा विदेशमा समेत बुद्ध जयन्ती मनाइयो । सो अवसरमा बुद्ध बिहार दमकले दमकका विकास र समृद्धिमा योगदान पुर्याएको भन्दै दमक नगरपालिकाका प्रमुख रामकुमार थापा, उपप्रमुख रेगिना भट्टराई प्रसाईंलगायत सामाजिक व्यक्तित्वहरुलाई सम्मान समेत गरेको थियो ।
