मोरङ, ३ जेठ / नेकपा एमाले पार्टीको मोरङको पथरी शनिश्चरे नगरपालिका कमिटीले वडाको ५ र ६ सिमानास्थित एकजना आर्थिक विपन्न परिवारको घरमा विजुली बत्ति बालिदिएर ३२ औँ मदन–आश्रित स्मृति दिवस मनाइएको छ ।
बिजुली बत्तिको समस्या रहेको वडाको पक्कीबाँध नजिकै रहेको बिन्दे माझीको घरमा पार्टी केन्द्रीय कमिटी सदस्य युवराज बास्कोटा, प्रदेश सदस्य दिलीपकुमार राई, नगर अध्यक्ष सञ्जीव गिरीले संयुक्त रूपमा बिजुलीको बत्ती बालेर र टेबुल पंखा चलाएर माझी परिवारको मुहारमा मुस्कान ल्याएको उल्लेख छ ।
नगर अध्यक्ष गिरीले नेकपा (एमाले) आफ्नो अनुकूलमा मात्र होइन, जस्तोसुकै प्रतिकूल बखतमा जनजन र मनमनको साथी भएकाले राजनीतिक नेता विशेषलाई विशेष दिनमा सम्झन पनि नयाँ ढंगले कार्यक्रम ल्याइएको बताउनु भयो । जननेता मदनकुमार भण्डारीले संगठन निर्माणकालमा अग्रज हरिमाया राईको घरलाई आश्रयस्थल बनाएर पसिना सिञ्चन गर्नुभएको साविकको हसन्दहस्थित विपन्न समुदायका जीर्णअवस्थाका घरलाई स्तरोन्नति गर्ने र फुसका छाना भएकालाई फुसको छानोमुक्त घर बनाइदिने घोषणा गर्नुभएको छ । पालिकाको ८ नं. वडाध्यक्षसमेत रहनुभएका जिल्ला कमिटी सदस्य नवीनजंग कार्कीले नगरको नीति कार्यक्रमअन्तर्गत यस्ता समस्यालाई सम्बोधन र व्यवस्थापन गर्न नसकेको स्थानीय श्रमदान जुटाएर भए पनि लक्षित समुदायको सहयोगी बन्ने उद्घोष गर्नुभयो । समाजमा विभिन्न कारणले एक्लाएक्लै हुनुपरेका, शारीरिक अशक्तको अवस्था जिउनुपरेका, वृद्धअवस्थाका बुबा–आमाको साथी एमाले नै हो भन्ने कुरा यी थुप्रै घटनाक्रमले पुष्टि गरेको स्थानीय बिन्दु उराव हर्षित मुद्रामा बताउनुहुन्छ ।
स्मृति दिवसका अवसरमा बिहानमात्र वडा नं. ८, शुक्रबारे दोहोलुमा वडाले निर्माण गरेको सामुदायिक सभाहल र हाटबजार वरिपरि विभिन्न १ सय २५ प्रजातिका वृक्षरोपण समेत गरिएको छ ।
उता, राष्ट्रिय युवा संघ नेपाल उर्लाबारी नगर कमिटीले मदन–आश्रित स्मृति दिवसका अवसरमा शनिबार साँझ उर्लाबारी–३ स्थित मदन भण्डारी स्मृति प्रतिष्ठान परिसरमा रहेको मदन भण्डारीको शालिकमा माल्यार्पण, श्रद्धाञ्जली अर्पण तथा दिप प्रज्वलन गरी दिवंगत नेताद्वयप्रति सम्मान व्यक्त गरिएको छ । कार्यक्रममा दिवंगत नेता मदन भण्डारी र जीवराज आश्रितको योगदानको स्मरण गरिएको थियो ।
मन्तव्य राख्दै युवा संघका केन्द्रीय सदस्य तथा वडा नं. ३ का वडाध्यक्ष भिष्मराज बुढाथोकीले मदन भण्डारीका विचारहरू बुझ्न जरुरी रहेको बताउनु भयो । उहाँले मदन मार्गमा हिँड्न सके मात्र देशको विकास र समृद्धिमा उल्लेखनीय सफलता प्राप्त गर्न सकिने धारणा राख्नुभयो ।
वि.सं. २०५० साल जेठ ३ गते चितवनको दासढुंगामा भएको रहस्यमय जीप दुर्घटनामा एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रितको निधन भएको स्मरणमा प्रत्येक वर्ष जेठ ३ गते यो दिवस मनाइँदै आएको छ ।
