पथरी, ३ जेठ / सृजना क्षेत्रमा सक्रिय मोरङको पथरी शनिश्चरेमा सञ्चालित सिङगिङ तथा डान्सिङ आइडल प्रतिष्पर्धाको मेघा अडिसनका रुपमा आज दुबै विधाबाट २०/२० छानिएका छन् ।
पहिलो अडिसनबाट हसन्दह र पथरीमा गरी नृत्यमा ११४ जना र गायनमा १०२ जनाले भाग लिएका थिए । जसमध्ये नृत्यतर्फ ४८ र गायनतर्फ ५७ गरी १०५जना छनोटमा परेका थिए । जसमध्ये दोस्रो चरणको प्रतिष्पर्धाबाट २०/२० छानिएको आयोजक कला साहित्य प्रवद्र्धन समितिका सचिव लक्ष्मीप्रसाद फुयाँलले जनाउनु भयो । तर सोको नतिजा भनें भोलि सार्वजनिक गरिने उहाँले उल्लेख गर्नुभयो ।
पथरी शनिश्चरे नगरपालिकाको आर्थिक व्यवस्थापनमा नगरको उपसमितिका रुपमा गठन भएको कला साहित्य प्रवद्र्धन समितिले पहिलो पटक पथरी शनिश्चरे नगरस्तरीय खुला सिङगिङ तथा डान्सिङ आइडलका लागि प्रतिष्पर्धा अघि बढेको हो ।
समितिको गीत संगीत विभाग प्रमुख अर्जुन सेञ्चुरी, नृत्य विधाका संयोजक रामबहादुर विश्वकर्माले प्रतियोगिताको संयोजन गर्नुभएको छ ।
जेठ १० गतेको तेस्रो चरणबाट उत्कृष्ठ १० /१० जना छानिनेछन् । त्यसपछि बन्द प्रशिक्षण समेत सञ्चालन सकेपछि चौथो तथा फाइनल चरण जेठ २४ गते हुने समितिका अध्यक्ष धनराज राई अमीरले जनाउनु भयो ।
फाइनलमा दुबै विधाका पहिलो, दोस्रो र तेस्रो हुनेलाई क्रमशः नगद ४० हजार, २० हजार र १० हजार तथा मेडल र प्रमाणपत्र प्रदान गरिने छ । कार्यक्रमको समापनका दिन नगर क्षेत्रका एकजना सर्जकलाई नगद २५ हजार, मुहारचित्र र सम्मानपत्रले सम्मानित समेत गरिने कार्यक्रम रहेको छ । समग्र कार्यक्रमका लागि नगरपालिका कार्यालयको ६ लाख रुपैयाँ बजेट विनियोजन भएको छ । २०७५ मा नगरपालिकाको उपसमितिका रुपमा गठित समितिले विगत ७ वर्षबाट साहित्य र कलाका गतिविधि वर्षेनी सञ्चालन गर्दै आएको छ ।
