झापा, जेष्ठ २१ – जिल्ला प्रहरी कार्यालय झापाको हिरासत कक्षमा रहेका थुनुवाहरूका लागि आज एकदिने निःशुल्क स्वास्थ्य शिविर सम्पन्न भएको छ।
प्रहरी र स्वास्थ्य सेवाबीचको समन्वयले मानवीय संवेदनशीलता झल्काउने कार्यक्रमले ५५ जना थुनुवालाई लाभान्वित गराएको छ। शिविरमा ४८ जना पुरुष र ७ जना महिला थुनुवाहरूको स्वास्थ्य परीक्षण गरिएको हो। कार्यक्रम बी एण्ड सी अस्पताल बिर्तामोडको सहकार्यमा सम्पन्न भएको हो।
स्वास्थ्य परीक्षणको नेतृत्व इन्भर्टनल मेडिसिन विभाग प्रमुख डा. गोपाल मिश्र, बीडीई डा. संजय थापा र सर्जन डा. गोविन्द खनालले गर्नुभएको थियो। चिकित्सा टोलीले थुनुवाहरूको समग्र स्वास्थ्य अवस्था मूल्यांकन गरी आवश्यक परामर्श समेत दिइएको जिल्ला प्रहरी कार्यालय झापाले जनाएको छ ।
प्रहरी प्रशासनका अनुसार, हिरासतमा रहेका व्यक्तिहरूको स्वास्थ्य सुरक्षामा विशेष ध्यान दिइँदै आएको छ, र यस किसिमका कार्यक्रमहरूले थुनुवाको मानवअधिकार सुनिश्चित गर्न मद्दत गर्छ।
