दमक, ४ असार / सडक सञ्जालबाट एसियाली राष्ट्रहरूलाई जोड्ने उद्देश्यका साथ निर्माण थालिएको ‘एसियन हाइवे’को काम धमाधम भइरहेको छ ।
पूर्वपश्चिम राजमार्ग अन्तर्गत एसियन हाइवे निर्माण तीब्र गतिमा सञ्चालन भइरहेको छ । पूर्वको झापास्थित काँकडभिट्टादेखि सुनसरीको लौकहीसम्म १२० किलो मिटरमध्ये अहिले ९५ दशमलब ७६ किलोमिटरमा कालोपत्रेको कार्य अघि बढ्दैछ । तर वर्षायाममा सडक निर्माण र यसको स्तरोेन्नति साथै यातायात आवागमनलाई कसरी सहज बनाउने भन्ने बिषयमा दमकमा सरोकारवालाबीच छलफल गरिएको छ ।
एसियाली विकास बैंकको युएसडी ३०० मिलियन तथा नेपाल सरकारको युएसडी ६२.४७ मिलियनको लागतमा एसियन हाइवेसँग जोडिएको सो क्षेत्रमा ३ वर्षमा निर्माण सम्पन्न गर्ने सम्झौता भएको १५ महिनामा करिब २३ प्रतिशत मात्रै काम सकिएको छ । निर्माणको कामले निरन्तरता पाए पनि लक्ष्यले गति लिन सकिरहेको छैन भने वर्षाको समयमा स्तरोन्नति भइरहेको पूर्वपश्चिम राजमार्गको खण्डमा बनाइएका डाईभर्सनहरु बगाएका छन् भने त्यसबाट दुर्घटना पनि उत्तिकै बढिरहेका छन् । सडक निर्माणका समयमा यात्रुहरुले समस्या पनि उत्तिकै भोगिरहेका छन् । सोहि विषयलाई मध्यनजर गर्दै सडक निर्माणको प्रगति र आईपर्न सक्ने समस्याका सन्दर्भमा छलफल अघि बढाइयो ।
सडक स्तरोन्नतीको कार्य प्रगतिको अवस्था मनसुनजन्य बिपतको समयमा अवरोध हुन नदिन भइरहेको प्रयास र सडक दुर्घटना न्यूनीकरण गर्न अबलम्बन गर्नुपर्ने उपायका बारेमा झापाका प्रमुख जिल्ला अधिकारी गोपाल कुमार अधिकारी सहितका सरोकारवालाहरुले उपाय अपनाउने बताएका छन् । छलफलमा जिल्लामा भएका सुरक्षाका प्रमुख, ट्राफिक प्रहरी, आयोजना कार्यालयका प्रमुख र सरोकारवालहरु सम्मिलित छलफलमा सहभागिले सडक स्तरोन्नतीका क्रममा आफ्नो तर्फबाट भएका प्रयास र आगामी दिनमा गर्ने रणनीतिका विषयमा जानकारी गराएका थिए । छलफलपछि प्रतिक्रिया दिदै निर्माण कम्पनी कालिका कन्स्ट्रक्सनका प्रतिनिधि उज्वल प्रसाईले सडक निर्माणको कार्यले तीब्रता पाएकाले समयमा नै काम सम्पन्न गर्ने दावी गर्नुभयो ।
आयोजना अन्तर्गत पूर्वीखण्डका प्रमुख सुनिलबाबु पन्तले अहिले पुल र कल्भर्ट सहितको काम २० प्रतिशत सम्पन्न भएको जानकारी दिनुभयो ।
सडकको अवस्था र डाईभर्सनका कारण पछिल्लो समय दुर्घटना पनि बढिरहेको छ । दुर्घटना न्यूनीकरणका लागि ट्राफिक प्रहरीको भूमिका अझ सक्रिय र व्यवस्थित हुने झापाका ट्राफिक प्रहरी प्रमुख गणेश पौडेलको भनाई छ ।
एकातर्फ सडक निर्माण कार्य सक्न समय लागिरहेको र अर्कोतर्फ यात्रुहरुलाई जोखिम पनि उत्तिकै बढिरहेको अवस्था छ । यस्तोमा जिल्ला प्रशासन कार्यालयले यस अघिनै पटक/पटक निर्माण व्यवसायी र आयोजना प्रमुखहरुलाई समस्या आउन नदिन निर्देशन दिएको झापाका प्रमुख जिल्ला अधिकारी अधिकारी बताउँनुहुन्छ ।
एसियन हाइवे थाइल्यान्डको बैंककबाट सुरू भई म्यान्मार, बङ्गलादेश, भारत हुँदै नेपालको काँकडभिट्टाबाट पूर्व–पश्चिम राजमार्ग भएर भारतको दिल्लीबाट पाकिस्तानको कराँचीसम्म पुग्नेछ । तीन वर्षमा निर्माण सम्पन्न गर्ने योजनाका साथ एशियाली विकास बैंकको आर्थिक सहयोगमा गत माघ १९ गतेदेखि सडक निर्माण कार्य सुरू भएको हो ।
