झापाको बिर्तामोड नगरपालिकामा सवारी दुर्घटना हुदा एक जनाकाे मृत्यु भएकाे छ भने अर्का एक जना घाइते भएका छन् ।
नगरपालिकाकाे ६ नम्बर वडा बुट्टाबारी स्थित पूर्व–पश्चिम लोकमार्गमा बुधबार दिउसाे १ बजे म्याजिक भेनले माेटरसाइकललाई ढक्कर दिदा एक जनाकाे मृत्यु भएकाे ईलाका प्रहरी कार्यालय अनारमनीले जनाएकाे छ ।
कार्यालयका अनुसार पूर्वबाट पश्चिमतर्फ आउँदै गरेको मे १ ज १९१८ नम्बरको म्याजिक भेनले बिपरित दिशाबाट जाँदै गरेको प्र १–०१–०१३ प ७३२६ नम्बरको मोटरसाईकललाई ठक्कर दिँदा मोटरसाईकलका चालक अर्जुनधारा नगरपालिका ११ का ५४ वर्षीय दिलिप राजवंशी र माेटरसाइकलकाे पछाडी सवार बिर्तामोड ४ का कृष्ण राजवंशी घाईते भएका थिए ।
घाइते दुबैलाई उपचारको लागी बि एण्ड सि अस्पताल बिर्तामोड लगिएकोमा मोटरसाईकल चालक दिलिपको उपचारको क्रममा मृत्यु भएको छ, भने पछाडि सवार कृष्णको सोही अस्पतालमा उपचार भईरहेको कार्यालयले जनाएकाे छ ।
दुर्घटनापछि भेन र चालक कार्यालयकाे नियन्त्रणमा लिएको छ भने घटनाको सम्बन्धमा थप अनुसमन्धान भईरहेको उक्त कार्यालयले जनाएकाे छ ।
