दमक , २४ असार । प्रधानमन्त्री केपी शर्मा ओली झापा आउनुहुने भएको छ । झापा र ईलाममा हुने बिभिन्न कार्यक्रममा सहभागी हुन प्रधानमन्त्री ओली २ दिनका लागि झापा आउँनुहुने भएको हो । दमकस्थित संघीय सांसदको सम्पर्क कार्यालयमा पत्रकार सम्मेलन गर्दै यस बारे जानकारी गराईएको हो ।
प्रधानमन्त्रीका स्वकीय उपसचिब तुलसी कार्कीका अनुसार प्रधानमन्त्री ओली असार २८ गते भद्रपुर बिमानस्थलबाट सोझै ईलामको माई नगरपालिकामा हुने कार्यक्रममा सहभागी हुन जाने र त्यसपछि झापाको कनकाई नगरपालिकामा आयोजना हुने कार्यक्रममा सहभागी बन्नुहुनेछ । सोही दिन प्रधानमन्त्रीको रात्री मुकाम दमकमा हुने कार्कीले जानकारी दिनुभयो ।
यस्तै असार २९ गते प्रधानमन्त्री ओलीले दमकस्थित मदनडाँगी ताराबारी डिपु सडकको उद्घाटन गर्नुहुने कार्यक्रम तय भएको कार्कीले जानकारी गराउनुभएको छ । त्यसलगत्तै प्रधानमन्त्री ओली हुलाकी राजमार्ग अन्तर्गत झापाको गौरीगञ्ज गाउपालिका र मोरङको रतुवामाई नगरपालिकाको सिमानामा पर्ने रतुवा खोलाको पुल उद्घाटनका लागि पुग्नुहुनेछ ।
असार २९ गतेनै प्रधानमन्त्री ओलीले झापाको बिर्तामोडस्थित सिटि सेन्टरमा आयोजना हुने अगुवा कार्यकर्ता प्रशिक्षणमा सहभागीता जनाउने बताईएको छ । सोही दिन साझ भद्रपुर बिमानस्थलबाट प्रधानमन्त्री संघीय राजधानी काठमाण्डौं फर्कने कार्यक्रम रहेको पत्रकार सम्मेलनमा जानकारी गराईएको थियो ।
