झापा, २८ असार । प्रधानमन्त्री केपी शर्मा ओलीले झापाको बुद्धशान्ति गाउँपालिकाको वडा नम्बर ३ मा रहेको १० शैयाको भागिरथा न्यौपाने नगर अस्पतालको उद्धघाटन गर्नुभएको छ ।
शनिबार उद्धघाटन समारोहपछि बोल्दै प्रधानमन्त्री ओलीले भन्नु भयो ‘अहिलेको क्याविनेटमा भागिरथाको नाम सुन्ने कोही पनि नभएको र म आफैले यहाँका साथीको सुझावका आधारमा यस अस्पतालको नाम भागिरथा न्यौपाने अस्पताल राख्न क्याविनेटबाट पारित गराएको हुँ ।’
सामाजिक चेतनाको बिगुल फुक्न न्यौपानेले गर्नुभएको योगदानका बारेमा अहिलेका पुस्तालाई जानकारी गराउन र उहाँको सम्मानका लागि पनि यो नाम राखिन पर्छ भन्ने अडानका साथ बुद्धशान्थि अस्पतालको नाम भागिरथा न्यौपानेको नाममा राखिएको उहाँको तर्क छ ।
उहाँले यो अस्पतालको सेवा विस्तार र गुणस्तर बृद्धि गर्न आफ्नो तहबाट हुनसक्ने सबैखाले सहयोग गर्ने प्रतिवद्धता समेत व्यक्त गर्नु भएको छ । उहाँले महिलाको रोगसंग सम्बन्धित उपचार सेवा अविलम्ब सुरु गर्न अनुरोध गर्नु भएको छ । ‘प्रसुती , गाइनो तथा महिलाको रोगसंग सम्बन्धित उपचार सेवा र इमरजेन्सी सेवा चाँडो सुरु गरिहाल्नुस् । त्यसमा म सहयोग गर्न तयार छु । ’ प्रधानमन्त्री ओलीले भन्नु भयो ।
यो कार्यक्रम सकेर प्रधानमन्त्री ओली इलामको माइ नगरपालिकातर्फ प्रस्थान गर्नु भएको छ । त्यहाँको वडा नम्बर २ मा नगर अस्पताल उद्घाटन साथै त्यहाँका भूमिहीन सुकुम्बासीहरुलाई धनीपुर्जा वितरण गर्ने र खानेपानी आयोजनाको शिलान्यास गर्ने कार्यक्रम रहेको छ ।
