दमक,८ साउन । कोशी प्रदेश प्रहरीले आर्थिक वर्ष २०८१÷८२ मा लागुऔषध गाँजा विरुद्धको चलाइएको अभियानका क्रममा २६ हजार ७०५ किलोग्राम तयारी गाँजा बरामद गरेको प्रहरीले जनाएको छ ।
यस्तै प्रहरीले १७ लाख ७२ हजारभन्दा बढी गाँजाका बोटहरू नष्ट गरेको छ । कोशी प्रदेश प्रहरी कार्यालय, विराटनगरका अनुसार गाँजा तस्करहरूले बिरामी बोक्ने एम्बुलेन्स, नक्कली सरकारी नम्बर प्लेट जडित गाडी, तरकारी बोक्ने सवारी, कोशी नदीको बहाव र जमिनमुनि लुकाएर समेत ओसारपसार गर्ने प्रयास गरेका थिए । तर, विशेष सूचना र अनुसन्धानमा आधारित प्रहरीको निरन्तरको सक्रियताले ती सबै प्रयासहरूलाई विफल पारेको छ ।
यस अभियानमा सबैभन्दा बढी सुनसरीबाट १२ हजार ३७५ किलो, बरामद गरिएको थियो,झापाबाट १ हजार ६५१ किलो गाँजा बरामद भएको छ । गाँजाको ओसारपसार र कारोबारमा संलग्न १६५ पुरुष र २४ महिला गरी कुल १८९ जनालाई पक्राउ गरिएको छ ।
कारबाहीका क्रममा ३१ वटा चारपाङ्ग्रे र ७५ वटा दुईपाङ्ग्रे गरी १०६ वटा सवारी साधन पनि नियन्त्रणमा लिइएको छ । त्यसैगरी, प्रहरीले प्रदेशका विभिन्न जिल्लामा करिब २ हजार ४६४ रोपनी क्षेत्रफलमा लगाइएका तथा प्राकृतिक रूपमा उम्रेका १७ लाख ७२ हजारभन्दा बढी गाँजाका बोट र बेर्ना नष्ट गरेको प्रहरीले जनाएको छ ।
