पथरी, ९ साउन / उत्तरपूर्वी मोरङको पथरी शनिश्चरे सृजना क्षेत्रमा अगाडि छ । जहाँ साहित्य र कलाका विभिन्न गतिविधिको सक्रियताको इतिहासलाई समेत स्मरण गर्दै नयाँ पुस्तामा सृजना जागरणको सन्देश छर्ने काम भइरहेको छ । जसमध्येको एक संस्था ‘शव्द थिएटर’ले नगरमा रंगमञ्चलाई विस्तार गर्दै ‘थिएटर हब’को रुपमा विकास गर्ने प्रयत्न गरिरहेको छ ।
पछिल्लो पटक ‘चरणदास चोर’ नाटकमार्फत नगरका विद्यालय तथा क्याम्पसका नवयुवा पुस्तालाई लक्षित गरेर सृजनाको माहोल खडागर्ने ध्याउन्तेमा छ ‘शव्द थिएटर’ । कला सस्तो मनोरञ्जनको साधन नभएको कुरा बुझाउँदै कलाको सम्मानका लागि टिकटमा नाटक देखाउने क्रमको यो दोस्रो नाट्य अभियान रहेको यसका निर्देशक जीवन बरालले अर्थ्याउनु भयो । ‘कला र कलाकारको सम्मानका लागि अनि नाट्यक्षेत्रलाई व्यवसायिक बनाउने हेतुले टिकटमा नाटक देखाउने र नगरका नवयुवा पुस्तामा सृजनाको विकास गराउने उद्देश्यमा हामी लागिरहेका छौं ।’– बरालले भन्नुभयो ।
हुनत, पथरी शनिश्चरेमा ०५० सालको सुरुवातताका केही नाटकहरु टिकटमा समेत देखाइएका थिए । त्यो बेलाको परम्परागत शैली र प्रविधिबिनाको जबरजस्तीजस्तो प्रयासको साक्षी रहनु भएका नाट्यकर्मी अशोक साम्पाङ नाटकको नयाँ प्रविधि र शैलीसंग जोडिएर नाट्ययात्रामा सामेल हुनुहुन्छ । ‘अनि देउराली रुन्छ’ नाटकबाट व्यवसायिक नाट्यात्रामा रहनु भएका साम्पाङ थिएटरलाई संस्थागत रुपमा दर्बिलो बनाउँदै नगरलाई ‘थिएटर हब’ निर्माणको योजनाको अगुवाई समेत गर्दै आउनु भएको छ ।
नाटकको अभ्यासको क्रम अन्तिम चरणमा पुगेको छ । एउटा चोरी गरिहिड्ने मान्छे कसरी रानीको प्रियपात्रसम्म बन्न पुग्छ भन्ने विषयलाई रमाईलो गरी नाटकमा प्रस्तुत गरेको छ । त्यसैभित्र राजनीतिक र सामाजिक मनोदशालाई पनि उजागर गरिएको छ ।
जसमा मोरङ र झापाका पुरानादेखि नाटक सिक्न रुचि राख्ने नवयुवा पुस्ताको समीश्रण रहेको छ । नाटकमा अशोक साम्पाङ, सुमन कुईकेल बराल, प्रेम खतिवडा, पुष्प राई, नविन रिजाल, सन्तोष छत्र राई, करुणा तिम्सिना, भूमिका बस्नेत, प्रसुना तिम्सिना, गृष्मा लिम्बू, अतिसर श्रेष्ठसहितको अभिनय देख्न पाइन्छ ।
भारतका हविव तन्वीरको लेखन रहेको ‘चरणदास चोर’ नाटकलाई नेपालका रंगकर्मी आसान्त शर्मा र राजन खतिवडाले नेपाली रुपान्तरण गर्नुभएको हो ।
