पथरी, १८ साउन / पथरी शनिश्चरे नगरपालिका वडा नम्बर १ का दुई बाल प्रतिभा आदर्श धिताल र निश्चल लिम्बू चर्चित गायन रियालिटी शो द भ्वाइस अफ किड्स सिजन ४ को फाइनलमा प्रवेश गर्नुभएपछि स्थानीयमा उत्साह छाएको छ ।
पञ्चायत माध्यमिक विद्यालयमा अध्ययनरत आदर्श र रेड स्टार माविमा अध्ययनरत निश्चल आफ्नो उत्कृष्ट गायन क्षमताका कारण देशभरबाट छानिएका प्रतिष्पर्धीहरूमध्ये अन्तिम चरणसम्म पुग्न सफल बन्नु भएको छ । दुबैको जितको लागि स्थानीयले जिताउ अभियाननै सञ्चालनमा ल्याएका छन् ।
पञ्चायत माविले कक्षा ८ मा अध्ययनरत आदर्शको जितका लागि भोटिङ गर्न आव्हान गर्दै जितको शुभकामना दिएको छ । प्रधानाध्यापक अर्जुनकुमार बुढाथोकीले आइतबार एक अपिल प्रकाशित गरी आदर्शमार्फत पथरी शनिश्चरेलाई राष्ट्रिय छवि निर्माणमा उभ्याउन नगरवासीलाई आव्हान गर्नुभएको छ ।
उता, रेडस्टार माविका प्रिन्सिपल टीएन तिम्सिनाले पनि कक्षा ५ मा अध्ययनरत निश्चलको जितका लागि भोट गर्न सबैमा अपिल गर्नुभएको छ ।
सो प्रतियोगिताको फाइनल चरणको प्रतिष्पर्धाका लागि साउन २४ गतेसम्म भोटिङ गर्ने अवधि तोकिएको छ ।
