दमक, २२ साउन । झापाको बिर्तामोड नगरपालिका–५ कंचन टोलका राजेन्द्र पंथाकको घरबाट ठूलो परिमाणमा प्रतिबन्धित औषधि बरामद भएको प्रहरीले जनाएको छ ।
इलाका प्रहरी कार्यालय अनारमनी र लागुऔषध नियन्त्रण ब्युरो काँकडभिट्टाको टोलीले पंथाकको घरमा बिहीबार बिहान १०ः२० बजेतिर छापा हानेको थियो । छापा हान्ने क्रममा घरभित्र भण्डारण गरेर राखिएको ठूलो परिमाणमा प्रतिबन्धित औषधि बरामद भएको प्रहरीले बताएको छ ।
प्रहरीले पंथाकको घरबाट ट्रमाडोल हाइड्रो क्लोराइड क्याप्सुल नामक प्रतिबन्धित औषधि २० हजार पिस बरामद गरेको छ । घरबाट प्रतिबन्धित औषधि बरामद भएसँगै ४६ वर्षीय पंथाकलाई पनि प्रहरीले नियन्त्रणमा लिएको छ ।
पंथाकले उक्त औषधि भारतबाट ल्याएर घरमा भण्डारण गरी अन्यत्र ‘सप्लाई’ गर्ने गरेको हुनसक्ने प्रहरीले बताएको छ । यस विषयमा इलाका प्रहरी कार्यालय अनारमनीका डीएसपी विजय श्रेष्ठ नेतृत्वको टोलीले थप अनुसन्धान गरिरहेको छ ।
