मोरङ,९ कार्तीक । मोरङको पथरी शनिश्चरे नगरपालिकाका दुई किशोरी तीन दिनदेखि सम्पर्कविहीन हुनु भएको छ ।शनिबार सालबारीमा फोटो खिच्न जाने भन्दै घरबाट निस्किनु भएकी १३ वर्षीया एन्जी बराइली र १६ वर्षीया शीतल घिमिरे हालसम्म घर नफर्किएपछि परिवार चिन्तित बनेका छन्।
बेपत्ता हुनेमा पथरी शनिश्चरे नगरपालिका–२ की एन्जी बराइली र वडा नम्बर ७ की शीतल घिमिरे रहनु भएको छ।परिवारका अनुसार दुवै किशोरी शनिबार घरबाट निस्किनु भएको थियो। त्यसयता उहाँहरू परिवारको सम्पर्कमा आँउनु भएको छैन।
दुवै किशोरी एकैसाथ सम्पर्कविहीन भएपछि परिवारले खोजीका लागि प्रहरीलाई जानकारी गराएको छ।इलाका प्रहरी कार्यालय पथरीले किशोरीहरू बेपत्ता भएको घटनाबारे अनुसन्धान भइरहेको जनाएको छ।प्रहरीले उहाँहरू अन्तिम पटक कहाँ देखिनु भएको थियो, सालबारी पुग्नु भएको थियो वा थिएन र त्यसपछि कहाँ गएका हुन सक्छन् भन्ने विषयमा जानकारी सङ्कलन गरिरहेको छ।तीन दिन बितिसक्दा पनि किशोरीहरूको अवस्था र उहाँहरू रहेको स्थानबारे जानकारी प्राप्त हुन सकेको छैन।
