दमक,साउन २२/पछिल्लो समय निजी विद्यालयहरू बालबालिकाको स्वास्थ्यप्रति सचेत बन्दै विभिन्न स्वास्थ्य कार्यक्रमहरूको आयोजना गर्न थालेका छन्। झापाको दमक–८ मा अवस्थित एलाईड ईङ्गलस बोर्डिङ स्कुलले एक दिने स्वास्थ्य शिविरको आयोजना गरेको छ।
विद्यालयले बालबालिका र अभिभावकहरूको स्वास्थ्यलाई मध्यनजर गर्दै शिविरको आयोजना गरेको हो। कार्यक्रम ओम शान्ति डेन्टल हस्पिटल र एञ्जल फाउण्डेसनको सहकार्यमा सम्पन्न भएको हो।
शिविरमा ओम शान्ति डेन्टल हस्पिटलका प्राविधिक र विशेषज्ञ टोलीले बालबालिका र अभिभावकहरूको दन्त परीक्षण गरेका थिए। परीक्षणको क्रममा धेरै बालबालिकामा दाँतमा किराले खाने समस्या देखिएको दन्त चिकित्सक डा.अञ्जली ठाकुरले बताउनुभयोे। उहाँले बालबालिकाको दन्त स्वास्थ्यप्रति विशेष ध्यान दिनुपर्ने आवश्यकता औंल्याउनुभयो।
ओम शान्ति डेन्टल हस्पिटलका सञ्चालक कमल गैरेका अनुसार, सामाजिक उत्तरदायित्व अन्तर्गत यस प्रकारको शिविर आयोजना गरिएको हो। शिविरमा सहभागी विद्यार्थीहरूलाई अस्पतालमा २० प्रतिशत छुट पनि प्रदान गरिने जानकारी दिनुभयो।
शिविरमा दन्त परीक्षणसँगै एञ्जल फाउण्डेसनको सहयोगमा पायल्स तथा फिस्टुला सम्बन्धी स्वास्थ्य परीक्षण पनि गरिएको थियो। साथै, विद्यालयमा नै रहेको स्वास्थ्य विभागमार्फत सामान्य स्वास्थ्य परीक्षण पनि गरिएको थियो।
विद्यालयका प्रिन्सिपल मित्र खत्रीका अनुसार, विद्यालयले यसअघि पनि यस्ता शिविरहरूको आयोजना गर्दै आएको छ। यसपटक पहिलोपटक अभिभावकहरूको पनि स्वास्थ्य परीक्षण गरिएकाले कार्यक्रम अझ प्रभावकारी भएको बताउनुभयो। यस्ता कार्यक्रमले बालबालिकामा स्वास्थ्यप्रति सचेतना बढाउने विश्वास प्रकट गर्नुभयो।
उक्त शिविरमा करिब ५०० जना विद्यार्थी, ३०० जना अभिभावक र ३५ जना कर्मचारीले स्वास्थ्य परीक्षणको लाभ लिएको विद्यालयले जनाएको छ।
