दमक, २४ साउन । सुनसरीको इटहरीमा भएको सवारी दुर्घटनामा बिर्तामोडका दुई युवाको मृत्यु भएको छ । शनिबार बिहान ११;२० बजे इटहरी उप–महानगरपालिका–२० पानीपिया जंगलस्थित कोशी लोकमार्गमा धरानबाट इटहरीतर्फ आउँदै गरेको को २२ प २१२५ नं. को स्कुटर र इटहरीबाट धरानतर्फ जाँदै गरेको प्रदेश नं. १ –०२–००२ ख ०४५५ नं. को बस एक आपसमा ठोक्किएको थियो । दुर्घटनामा स्कुटर चालक बिर्तामोड– ५ बस्ने वर्ष अन्दाजी २६ का सुजन बि.क. र पछाडि सवार बिर्तामोड ५ कै वर्ष अन्दाजी २२ का सुरज बि.क. को मृत्यु भएको प्रहरीले बताएको छ । दुवै घाइतेलाई उपचारको लागि बिपी कोइराला स्वास्थ्य विज्ञान प्रतिष्ठान धरान घोपा पठाएकोमा उपचारका क्रममा १२;३० बजे दुवैको मृत्यु भएको प्रहरीले बताएको छ ।
काका भतिजा सम्बन्धमा रहेका उनीहरू चतराबाट फर्किँदै गरेको बताइएको छ । मृतकहरूको शव घोपामा रहेको र आफन्तहरू आइपुगेको इलाका प्रहरी कार्यालय इटहरीका प्रहरी नायव उपरीक्षक लक्ष्मी भण्डारीले जानकारी दिनु भयो । घटनाबारे अनुसन्धान भइरहेको उहाँले जानकारी दिनु भयो । स्कुटर , बस र बस चालक उदयपुर बेलका ३ बस्ने २९ वर्षीय प्रेम मगरलाई इलाका प्रहरी कार्यालय इटहरीले नियन्त्रणमा लिएको प्रहरीले जनाएको छ ।
बिर्तामोड र मोरङको बेलवारीमा सुनचाँदीको काम गर्ने सुजन र सुरजको मृत्युले बिर्तामोडका व्यवसायीहरू शोकाकुल बनेको नेपाल सुनचाँदी व्यवसायी संघ झापाका अध्यक्ष रमेश बराइलीले बताउनु भएको छ ।
