दमक, २७ साउन । कोशी प्रदेशका पाँच जिल्लामा पछिल्ला वर्षहरूमा तीव्र बन्दै गएको हात्ती–मानव द्वन्द्वले स्थानीय बस्तीमा ‘हात्तीविरोधी’ भावना चुलिँदै गएको छ।
यसै पृष्ठभूमिमा, प्रदेश सरकारले हात्तीको उपस्थितिलाई शत्रु होइन, सहअस्तित्वको दृष्टिले बुझाउन ५० लाख रुपैयाँको बीमा कार्यक्रम ल्याउने निर्णय गरेको छ।
चालु आर्थिक वर्षदेखि नमुना परियोजनाका रूपमा झापाबाट सुरु हुने यस योजनाका लागि प्रदेश सरकारले रकम झापा डिभिजन वन कार्यालयमार्फत कार्यान्वयन गर्न स्वीकृत गरिसकेको छ। कार्यक्रमको कार्यविधि तयार पार्न बिमा प्राधिकरण, कोशी प्रदेशको पर्यटन, वन तथा वातावरण मन्त्रालय र सम्बन्धित निकायबीच छलफल तीव्र रूपमा भइरहेको मन्त्रालयका सचिव विशाल घिमिरेले बताउनु भयो ।
यसअघि भएको प्रारम्भिक छलफलमा बीमा प्राधिकरणले हात्तीबाट हुने मानव मृत्यु, घाइते, घर तथा अन्नको नोक्सानीको तथ्याङ्क संकलन गरिरहेको छ। अब बीमा लागु हुने पालिका, डिभिजन वन कार्यालय, बीमा प्राधिकरण र बीमा कम्पनीबीच सहमति जुटाएर रकम वितरणसम्बन्धी निर्देशिका तयार गरिनेछ।
यस कार्यक्रमले हात्तीप्रति फैलिएको नकारात्मक धारणा न्यूनीकरण गर्नुका साथै मानव–वन्यजन्तु सहअस्तित्वको वातावरण बनाउन सहयोग पुग्नेछ। झापाबाट सुरु भएको यो मोडल सफल भए, निकट भविष्यमै यसलाई प्रदेशका अन्य प्रभावित जिल्लामा विस्तार गरिने योजना छ।
