भद्रपुर, २७ साउन । अन्तर्राष्ट्रिय युवा दिवसको अवसर पारेर भद्रपुरमा आयोजित हाफ म्याराथनमा पुरुषतर्फ नेपाल आर्मीका धावक करुण रावल र महिलातर्फ पाँचथरकी पुष्पा शेर्मा लिम्बू विजयी बनेका छन्।
पुरुषतर्फको प्रतिस्पर्धामा करुण रावलले १ घण्टा ८ मिनेटमा १९ किलोमिटर दुरी पार गर्दै उपाधि रक्षा गरेका हुन्। उनले अघिल्लो वर्ष पनि सो उपाधि जितेका थिए। रावललाई पछ्याउँदै नेपाल आर्मीका नै धनु मानन्धर दोस्रो स्थानमा रहे भने दमकका सरोज सिंह तेस्रो भए। दमककै सागर लिम्बूले सान्त्वना पुरस्कारमा चित्त बुझाए।
महिलातर्फ, पुष्पा शेर्मा लिम्बूले ५४ मिनेट ४७ सेकेन्डमा १३ किलोमिटर दुरी पार गर्दै उपाधि जितिन्। दमककी याविका देवान दोस्रो स्थानमा रहिन् भने भद्रपुरकी विन्दा राई तेस्रो भइन्। रीता मुर्मुले सान्त्वना पुरस्कार प्राप्त गरिन्।
प्रतियोगितामा प्रथम हुनेलाई २५ हजार, दोस्रो हुनेलाई १५ हजार, तेस्रे हुनेलाई १० हजार नगदसहित शिल्ड र प्रमाणपत्रका साथै सान्त्वना पुरस्कारस्वरूप ५ हजार रूपैयाँ प्रदान गरिन्छ ।
भद्रपुर नगरपालिका युवा परिषदको आयोजनामा भएको यो दौड प्रतियोगिता चन्द्रगढबाट सुरु भई किच्चकवधसम्मको मार्गमा सम्पन्न भएको हो। यस दौडको उद्देश्य भद्रपुरका पर्यटकीय स्थलहरूको प्रवर्धन गर्नु रहेको आयोजकले जनाएका छन्।
