पथरी, ३१ साउन / काठमाडौंसम्मको लामो अनुभव संगालेर व्युटिसियन क्षेत्रमा स्थापित कृष्णकुमारी (कृषा) पोखरेल तिम्सिनाले आफ्नै नगर मोरङको पथरी शनिश्चरेमा तालिम सेन्टरका रुपमा समेत स्थापित गर्नेगरी कृषा व्यूटी एण्ड फेसन हाउस सञ्चालनमा ल्याउनु भएको छ ।
नगरको वडा नं १ स्थित मन्दिरलाइनमा स्थापित कृषा व्यूटी एण्ड फेसन हाउसको १ नम्बर वडाअध्यक्ष भीमकुमार राई र पथरी उद्योग वाणिज्य संघका अध्यक्ष दीपक बस्नेतले संयुक्त रुपमा उद्घाटन गर्नु भएको छ ।
सो अवसरमा शुभकामना मन्तव्य व्यक्त गर्दै पथरी शनिश्चरे १ का अध्यक्ष भीमकुमार राईले नगर र वडामा व्यूटिसियन र सिलाई कटाई सम्बन्धिका तालिममा सहकार्य गर्दै अघि बढ्न प्रोत्साहित गर्नुभयो ।
सो अवसरमा पथरी उद्योग वाणिज्य संघका अध्यक्ष दीपक बस्नेतले नगरको सौन्दर्य व्यवसायको प्रवद्र्धनमा सो फेसन हाउसले महत्वपूर्ण भूमिका निर्वाह गर्ने विश्वासकासाथ शुभकामना व्यक्त गर्नुभयो ।
विगत २५ वर्षदेखि व्युटिपार्लर तथा फेसन क्षेत्रमा काम गर्दै आउनुभएकी पथरी शनिश्चरे १० कि तिम्सिनाले दर्जनौं चलचित्र र म्यूजिक भिडिओमा साजसज्जाको काम समेत गर्नुभएको छ । उहाँले व्युटिसियन र टेलरिङ क्षेत्रमा तालिम समेत प्रदान गर्दै आउनुभएको छ । आधुनिक साजसज्जा तथा महिलाका लागि फेसनेवल डिजाइनको काममा ख्याति कमाउँदै आउनु भएको छ । विगत ११ वर्ष काठमाडौंमा यसखाले व्यवसाय सञ्चालन गरेर झापाको दमकहुँदै आफ्नै नगर पथरी शनिश्चरेमा कर्मथलो बनाउन थाल्नु भएकी तिम्सिनाले सीटीइभीटीको लेभल २ तालिम प्राप्त गर्नुभएको छ । उहाँले सुन्दरी प्रतियोगितासहितका कला क्षेत्रको अनुभव समेत संगाल्नु भएको छ ।
व्यवसाय द्घाटनका अवसरमा बोल्दै प्रोप्राइटर तिम्सिनाले अव पथरी शनिश्चरेमा व्यवसायिक रुपमा तालिम समेत प्रदान गर्दै आफ्नै नगरमा थप सुन्दरता निखार्ने प्रयास गर्ने जनाउनु भयो । ‘मैले जे जति सिकें, काठमाडौंसम्मको संघर्षले सिकाएको जीवनको समेत थप पाठबाट अब फेरि आफ्नै नगरमा परिस्कृत भएर आएकी छु । सबैको साथसहयोगमा यस क्षेत्रमा प्रभावकारी काम गर्न सकिन्छ ।’
पथरी बजारबाट सो पेसा सञ्चालन गरेर अघि बढ्दै गएको प्रसंग ल्याउँदा उनी निकै भावुक बन्नुभयो ।
उद्घाटनका अवसरमा पथरी जेसीजकी अध्यक्ष निर्मला भट्टराई, समाजसेवी नरहाङ राई, राधा ढकाल, पथरी शनिश्चरे नगरका सूचना संयोजक सन्तोष राईलगायतका सामाजिक व्यक्तित्व तथा पत्रकारहरुको उपस्थिति रहेको थियो ।
