दमक, ३१ साउन । झापाको बिर्तामोड २ रामचोकस्थित एक ग्यारेजमा गएराति आगलागी भएको प्रहरीले जनाएको छ ।
राति ११.१५ बजे रामचोकमा वडा नं १ बस्ने यदुनाथ मिश्रले संचालन गरेको ग्यारेजमा अचानक बिद्युत सर्ट भई आगलागी भएको हो । आगलागीबाट एकतले टिनको छानो, टिनको बेरा भएको ग्यारेज र इन्जिन बनाउने ६ वटा मेसिन, बनाउन ल्याएको बिभिन्न सवारी साधनहरुको ६–७ वटा इन्जिन पूर्णरुपमा जलेर नष्ट भएको छ ।
साथै सोही ग्यारेजमा मर्मतको लागि ल्याएको मे १ क ६४४ नम्बरको टिपरको अगाडीको भागमा सामान्य क्षति पुगेको छ । आगलागीबाट करिव १० लाख बराबरको क्षति भएको अनुमान गरिएको प्रहरीले जनाएको छ।
उक्त आगो बिर्तामोड र भद्रपुर नगरपालिकाको दुईवटा दमकल र इलाका प्रहरी कार्यालय बिर्तामोडको प्रहरी टोली र स्थानीयबासीको सहयोगमा राति १२ बजे पूर्णरुपमा नियन्त्रणमा आएको प्रहरीले बताएको छ ।
