दमक, १ भदौ । कोशी प्रदेशको राजधानी विराटनगरमा लामो समयदेखि निरन्तर रुपमा आयोजना हुँदै आएको ऐतिहासिक तथा साँस्कृतिक राधाकृष्ण रथयात्राका अवसरमा प्रदेश सरकारका मुख्यमन्त्री हिमन्त कुमार कार्कीले प्रदेशवासी एवं विदेशमा रहँदै आएका कोशीवासी नागरिकलाई शुभकामना व्यक्त गर्नुभएको छ।
मुख्यमन्त्री कार्कीले आइतबार शुभकामना सन्देश जारी गर्दै विराटनगरमा बसोबास गर्ने सम्पूर्ण धर्म, संस्कृति र परम्परा लगायतका पवित्र मूल्य मान्यताहरुको संरक्षण र प्रवद्र्धनमा रथयात्राले महत्वपूर्ण भूमिका खेल्दै आएको उल्लेख गर्नुभएको छ।
कोशी प्रदेश विभिन्न जाति, भाषा र संस्कृतिको साझा थलो भएको उल्लेख गर्दै उहाँले मातृभाषा, बहुभाषिकता र बहुसांस्कृतिक पहिचानलाई आत्मसात् गर्दै रथयात्राले सामाजिक एकता, सहिष्णुता तथा साझापना मजबुत बनाउँदै ल्याएको बताउनुभयो।
वि.सं. १८९८ सालदेखि सुरु भएको यो रथयात्रा आजसम्म निरन्तर रुपमा सञ्चालन हुँदै आएको भन्दै शुभकामना सन्देशमा यसको ऐतिहासिक, धार्मिक र सांस्कृतिक महत्वलाई उठान गरिएको छ। मुख्यमन्त्रीले ‘समृद्ध नेपाल, सुखी नेपाली’को राष्ट्रिय आकांक्षालाई सार्थक बनाउन धार्मिक तथा सांस्कृतिक पर्यटक प्रवद्र्धन गर्न कोशी प्रदेश सरकारले विशेष प्राथमिकताका साथ कार्यक्रमहरु अघि बढाइरहेको जानकारी समेत दिनुभएको छ।
रथयात्राको माध्यमबाट धार्मिक पर्यटनसँगै रोजगारी र राष्ट्रिय आर्थिक विकासमा समेत प्रत्यक्ष योगदान पु¥याउन सकिने भएकाले यस्तो सांस्कृतिक प्रधान उत्सवहरु संरक्षण गर्नु सबैको साझा दायित्व भएको मुख्यमन्त्री कार्कीको भनाइ छ।
