दमक,२भाद्र । कोशी प्रदेश सरकारले पहिलोपटक प्रदेश राजस्व कार्यालय उद्घाटन गरेको छ । प्रदेशको राजस्व संकलनमा सहजीकरण गर्ने उद्देश्यले कार्यालय सञ्चालनमा ल्याइएको हो ।
प्रदेशको क्षेत्राधिकार भित्रपर्ने विषयमा आवश्यक सहजीकरण गर्न र प्रदेशको राजस्वलाई वृद्धि गर्नको लागि सोमबारदेखि कार्यालय सञ्चालनमा ल्याइएको प्रदेश सरकारले जनाएको छ । कोशी प्रदेश सरकारका आर्थिक मामिला तथा योजनामन्त्री रामबहादुर राना मगरले सुनसरीको इटहरीमा प्रदेश राजस्व कार्यालयको उद्घाटन गर्नु भएको छ ।
कार्यालयको उद्घाटन गर्दै मन्त्री रानाले प्रदेश सरकारले सोचेअनुसारको राजस्व संकलन गर्न नसकिरहेको परिप्रेक्ष्यमा कार्यालय उद्घाटन गरिएको बताउनु भयो । जनतालाई करको बोझ नहुने गरी राजस्व वृद्धि गर्नका लागि कार्यालय सञ्चालनमा ल्याइएको उहाँले स्पष्ट र्पानु भयो ।
‘कुन–कुन क्षेत्रबाट राजस्व उठाउन सकिएको छैन, त्यसको पहिचान गरेर कार्यालयले राजस्व उठाउन सहजीकरण गर्नेछ,’ उहाँले भन्नु भयो। प्रदेश सरकारहरूमा पहिलोपटक कोशी प्रदेश सरकारले यस्तो कार्यालय स्थापना गरेको हो ।
कोशी प्रदेश सरकारले गत आर्थिक वर्षमा ४ अर्ब ९८ करोड राजस्व संकलन गर्ने लक्ष्य लिएकोमा ९८ प्रतिशत सफलता हासिल गरेको थियो । चालु आर्थिक वर्षमा ५ अर्ब ५० करोड राजस्व उठाउने सरकारको लक्ष्य छ ।
कार्यालय उद्घाटन समारोहमा कोशी प्रदेशसभा सदस्य (प्रदेश सांसद) रमेश बस्नेत, सुनसरीका प्रमुख जिल्ला अधिकारी धर्मेन्द्रकुमार मिश्र, मुख्यमन्त्री हिक्मतकुमार कार्कीका आर्थिक सल्लाहकार डाक्टर मोहन सुवेदी लगायतले बोल्नु भएको थियो। प्रदेश सरकारले शाखा अधिकृत विदुर पौडेललाई प्रदेश राजस्व कार्यालयको प्रमुखका रूपमा खटाएको छ ।
