दमक,९भदौ । प्रधानमन्त्री केपी शर्मा ओलीले रासायनिक मल वितरण र व्यवस्थापनबारे कार्ययोजना प्रस्तुत गर्न दिएको समयसीमा बितेको धेरै दिन हुँदा पनि कार्ययोजना प्रस्तुत हुन सकेको छैन ।
प्रधानमन्त्री ओलीले कृषि तथा पशुपन्छी विकास मन्त्रालयलाई गत २७ साउनमा तीन दिनभित्र कृषि मल व्यवस्थापन र उत्पादन वृद्धिबारे ठोस योजना ल्याउन कृषि तथा पशुपन्छी विकास मन्त्रालयलाई निर्देशन दिनु भएको थियो।
प्रधानमन्त्रीले निर्देशन दिनु भएको १२ दिन पुगिसक्दा पनि योजना पेस हुन सकेको छैन । कृषि तथा पशुपन्छी विकास मन्त्रालयले यस विषयमा कार्ययोजना तयार गरेर राखे पनि प्रधानमन्त्री कार्यालयबाट समय नपाउँदा पेस हुन नसकेको बताइएको छ । कृषि मन्त्रालयका सहसचिव रामकृष्ण श्रेष्ठले प्रधानमन्त्रीको निर्देशनबमोजिम प्रतिवेदन तयार बनाएर राखेको र बोलाउने बित्तिकै पेस गर्ने जानकारी दिनु भएको छ ।
यसअघि प्रधानमन्त्री ओलीले २०८१ फागुन १ गते पनि किसानलाई रासायनिक मलको अभाव हुन नदिन र कालोबजारी रोक्न ठोस कार्ययोजना ल्याउन कृषि तथा पशुपन्छी विकास मन्त्रालयलाई निर्देशन दिनु भएको थियो ।
प्रधानमन्त्रीले मलको विषयलाई चासोका साथ लिएर ठोस कार्ययोजना ल्याउन निर्देशन दिए पनि यस विषयले भने प्राथमिकता पाउन सकेको छैन । माग अनुसार मलको आपूर्ति नहुँदा, वितरण प्रणाली प्रभावकारी नहुँदा किसानले बर्सेनि मलको समस्या झेलिरहेका छन् ।
