दमक,१० भदौ । आज भाद्र शुक्ल तृतीयाका दिन हिन्दु महिलाहरू हरितालिका तीज पर्व मनाउँदै छन्।। आज भाद्र शुक्ल तृतीयामा व्रत बसी शिवको पूजा, उपासना गरेमा पारिवारिक सुख, शान्ति र कल्याण प्राप्त हुने धार्मिक विश्वास रही आएको छ । हिजो दर खाएपछि औपचारिक रूपमा शुरू भएको तिज पर्व पर्सि ऋषि पञ्चमीसम्म मनाइन्छ ।
आज भाद्र शुक्ल तृतीयाका दिन देवादिदेव महादेवको पूजाआराधना गरी व्रत बस्नुका साथै नाचगान गरेर धूमधामसँग तीज मनाउने गर्छन् । पतिको लागि आज व्रत बसेका नारीहरूको अटल सौभाग्य हुने मान्यता छ।
हिजोको दरको भरमा आजको दिन निराहार र निर्जला व्रत बस्ने चलन छ । पार्वतीले शिवजी वरका रूपमा प्राप्त गरौँ भनी मनोकामना राखी तीजको व्रत बसेपछि तीजको चलन चलेको जनविश्वास रहिआएको छ । आजको दिनमा शिव मन्दिर र शिवालयहरूमा दर्शनार्थीको विशेष भीड हुने गर्दछ । आजको दिन पशुपतिनाथ मन्दिर लगाएत देशभरका शिवालय परिसरमा रातो रंगमा सजिएका हर्षित, उत्साहित विवाहित, अविवाहित महिलाहरूको बाक्लै उपस्थिति हुने गर्छ ।
