विराटनगर,२४ भदौ । विराटनगरस्थित नेकपा एमालेको पार्टी कार्यालयमा प्रदर्शनकारीले आगजानी गरेका छन् ।
सोमबार देशभर सुरु भएको जेन–जीको आन्दोलनमा सरकारले निर्मम दमन गरेर १९ जनाको ज्यान लिएपछि आक्रोशित प्रदर्शनकारीको समूहले विराटनगर पाञ्चालीस्थित एमालेको कार्यालयमा आगजानी गरेको छ ।
विराटनगरमा जारी भएको कफ्र्यूको अवज्ञा गर्दै हजारौं प्रदर्शनकारी चोक–चोकका सडकमा प्रदर्शन गरिरहेका छन् । उनीहरुले सरकारको नेतृत्व गरेको दलको कारण १९ जनाको हत्या भएको भन्दै एमालेको कार्यालयमा आगजानी गरेका छन्् ।
प्रदर्शनकारीकारीले ट्राफिक चोकस्थित आन्तरिक राजश्व कार्यालयमा पनि आगजनी गरेका थिए। कार्यालयका सामान बाहिर ल्याएर उनीहरुले आगजनी गरिरहेका छन् ।
विराटनगरका चौतर्फी प्रदर्शनको कारण सुरक्षाकर्मीको नियन्त्रण बाहिर परिस्थिति पुगेको छ । सुरक्षाकर्मीले प्रदेशसभा, मुख्यमन्त्री कार्यालय, मन्त्रालयहरु तथा मुख्यमन्त्री र मन्त्रीको निवासको सुरक्षामा केन्द्रित हुँदा बजार क्षेत्रमा नियन्त्रण बाहिर पुगेको छ ।
उता सुनसरीको इटहरीमा कोशी प्रदेशका आन्तरिक मामिला तथा कानुनमन्त्री रेवतीरमण भण्डारीको घरमा प्रदर्शनकारीले तोडफोड गरेका छन् । इटहरीमा कफ्र्यूको अवज्ञा गर्दै इटहरीमा प्रदर्शनमा ओर्लिएको समूहले इटहरी–६ स्थित मन्त्री भण्डारीकोक घरमा तोडफोड गरेको छे ।
तोडफोडबाट घरको सिसा फुटेका छन् । घटनाको विस्तृत जानकारी आइसकेको छैन । जिल्ला प्रशासनले इटहरी क्षेत्रमा प्रर्दशन गर्न, भेला हुन र सभा गर्न नपाउने गरी अनिश्चितकालिन कफ्र्यू आदेश जारी गरेको भएपनि त्यसको अवज्ञा भएको छ ।
प्रदर्शनकारीले मन्त्री भण्डारीको घरको सिसा, अगाडीको गेट तोडफोड गरेपछि आगजनीको प्रयास गरेका थिए । तर, घरमा अन्य मानिसहरु पनि भाडामा बस्ने भन्दै केही केहि प्रदर्शनकारीले नै आगजानी रोकेका हुन् ।
