दमक २७ भदौ । दमक नगरपालिकाका नगर प्रमुख राम कुमार थापाले नगरवासीलाई शान्ति र सुव्यवस्था कायम गर्न विशेष ध्यान दिन आग्रह गर्नुभएको छ।
वर्तमान परिस्थितिमा अन्योल र अनिश्चितताको लाभ उठाउँदै अवाञ्छित गतिविधि बढ्न सक्ने सम्भावनाबारे सचेत रहँदै नगर प्रमुख थापाले टोल टोलमा शान्ति र सुरक्षा सुनिश्चित गर्न सबैलाई सचेत गराउनुभएको हो।
उहाँले विशेषगरी टोल अध्यक्षहरूलाई संगठनात्मक रूपमा टोलवासीलाई संगठित गरी जिउधनको सुरक्षा प्रबन्ध मिलाउन आग्रह गर्नुभएको छ। साथै, जबसम्म वर्तमान अनिश्चितताको वैधानिक अन्त्य नहुने हो, तबसम्म उच्च सतर्कताका साथ टोलस्तरमा सहयोग गर्नुपर्नेमा नगर प्रमुखले जोड दिनुभएको छ।
सन्देशमार्फत उहाँले नगरभित्रका सामाजिक संघसंस्था, मानवअधिकारवादी संगठन तथा नागरिक समाजलाई पनि आपसी सहकार्य र समन्वयमार्फत नगरमा शान्ति, सुव्यवस्था र कानुनी राज्यको प्रत्याभूति दिलाउन अनुरोध गर्नुभएको छ।
नगर प्रमुख थापाद्वारा जारी गरिएको यो सन्देशलाई नगरवासीहरूले परिस्थितिअनुकूल अपनाउनुपर्ने महत्वपूर्ण निर्देशनका रूपमा लिइएको छ।
