झापामा हट्यो कर्फ्यु
झापा, २८ भदौ | झापा जिल्लामा लगाइएको कर्फ्यु आजदेखि हटाइएको छ ।
भदौ २३ र २४ गते Gen Z नेतृत्वको आन्दोलनका कारण शान्ति सुरक्षा प्रभावित भएपछि जिल्ला प्रशासन कार्यालयले जिल्लाभर कर्फ्यु आदेश जारी गरेको थियो ।
आज प्रमुख जिल्ला अधिकारी गोपालकुमार अधिकारीको अध्यक्षतामा बसेको जिल्ला सुरक्षा समितिको बैठकले स्थिति सामान्यतर्फ फर्किएको निष्कर्ष निकाल्दै कर्फ्यु हटाउने निर्णय गरेको हो ।
आजको बैठकमा जिल्ला प्रहरी प्रमुख राजन लिम्बु, सशस्त्र प्रहरी नायब उपरीक्षक तुलबहादुर भण्डारी, राष्ट्रिय अनुसन्धान उपनिर्देशक अमोघ पाण्डे लगायतको उपस्थिति रहेको थियो ।
बैठकले सुरक्षाकर्मीलाई निरन्तर सतर्क रहि समन्वय र सूचना आदानप्रदान गर्दै शान्ति सुरक्षा कायम गर्न निर्देशन दिएको छ ।
प्रशासनले आकस्मिक रूपमा लुटपाट, आगजनी वा आपराधिक गतिविधि हुने सम्भावनालाई ध्यानमा राख्दै आवश्यकताअनुसार तुरुन्त कदम चालिने चेतावनी समेत दिएको छ ।
कर्फ्यु हटेसँगै झापामा दैनिक जनजीवन सामान्यतर्फ फर्किने अपेक्षा गरिएको छ ।
