काठमाण्डौ, ३० भदौ । वाणिज्य, आपूर्ति तथा उपभोक्ता संरक्षण विभागले माग, आपूर्ति र मूल्यमा प्रतिकूल प्रभाव पार्ने गरी वस्तु सञ्चित नगर्न आग्रह गरेको जनाएको छ । विभागले विज्ञप्ति निकालेर बजारमा अत्यावश्यक उपभोग्य वस्तुहरूको अभाव नरहेको भन्दै आवश्यकता भन्दा धेरै खरिद तथा सञ्चय नगर्न आग्रह समेत गरेको छ ।
सामान्यतया कुनै सङ्कट देखा परेमा दैनिक उपभोग्य वस्तु धेरै किनेर घरमा राख्ने प्रवृत्ति रहेको हुन्छ । यसतर्फ ख्याल गर्दै विभागले बजारमा अभाव नहुने भन्दै आवश्यकता अनुसार मात्रै किन्न भनेको छ ।
यस्तै कतिपय व्यापारीहरूले पछि महँगोमा बेच्न सकिने आशामा धेरै वस्तु भण्डारण गर्ने जोखिम पनि रहेको हुन्छ । विभागले उपभोक्ता हित संरक्षणका लागि वस्तु सञ्चित नगर्न÷नगराउन निजी क्षेत्र र आवश्यकता भन्दा धेरै खरिद नगर्न उपभोक्तालाई अनुरोध गरेको जनाएको छ ।
