काठमाण्डौ,५ असोज । जेनजी प्रदर्शनका क्रममा तोडफोड र आगजनी गरी कारागार र सुधारगृहबाट भागेकामध्ये अहिलेसम्म छ हजार तीन सय २८ जना कैदीबन्दी फर्किएको प्रहरीले जनाएको छ । कारागार व्यवस्थापन विभागका निर्देशक चोमेन्द्र न्यौपानेले दैनिक जसो नै कैदीबन्दीहरू फर्किरहेको बताँउनु भयो । उहाँका अनुसार कतिपय गल्ती भयो भनेर आफैँ फर्किरहेका छन् भने कतिपय प्रहरीले पक्राउ गरेर ल्याइएका छन् ।
गएको भदौ २३ र २४ गतेको प्रदर्शनका क्रममा देशभरका २८ कारागार तथा नौ वटा बालसुधार गृहबाट गरी १४ हजार पाँच सय ५५ कैदीहरु भागेका थिए । अझै आठ हजार दई सय २६ जना सम्पर्कमा नआएकाले खोजी भइरहेको निर्देशक न्यौपानेले जानकारी दिनु भयो। उहाँका अनुसार कारागारबाट १३ हजार पाँच सय ९१ र सुधारगृहबाट नौ सय ६४ जना भागेका थिए ।
सम्पर्कमा आएका मध्ये कारागारबाट भागेका पाँच हजार नौ सय ८७ तथा सुधारगृह तर्फका तीन सय ४१ जना रहेका छन् । आन्दोलनका क्रममा नेपाल प्रहरीले हिरासतमा रहेका झन्डै दुई हजार आरोपी समेत फरार रहेका छन् । उनीहरूको खोजी भइरहेको नेपाल प्रहरीका केन्द्रीय प्रवक्ता, प्रहरी नायब महानिरीक्षक विनोद घिमिरेले बताँउनु भयो । देशभर ३० हजार छ सय ३४ कैदीबन्दी रहेकामा आन्दोलनपछि अहिले झन्डै २२ हजार कैदीबन्दी रहेका छन् ।
