काठमाण्डौँ,५ असोज । राष्ट्रिय स्वतन्त्र पार्टी (रास्वपा) भित्र परिवर्तित परिस्थिति र चुनाव कारण देखाउँदै ‘अर्लि महाधिवेशन’को बहस सुरु भएको छ । पार्टीका कार्यवाहक प्रवक्ता मनिष झाले मध्यावधि चुनावलाई ख्याल गर्दै ‘अर्लि महाधिवेशन’बारे छलफल सुरू भएको स्वीर्कानु भएको छ ।
तर, पार्टी केन्द्रीय समितिले कुनै निर्णय भने लिएको छैन ।आउँदो मंसिर महिनामै गर्ने गरी महाधिवेशन मिति सारौँ भन्ने धारणा पार्टीकै केन्द्रीय नेताहरुबाट आइ रहेको र आफू पनि त्यही पक्षमा रहेको उहाँले बताउनु भयो । पार्टी केन्द्रीय समितिले २०८२ फागुन ७, ८ र ९ गते राष्ट्रिय महाधिवेशन गर्ने निर्णय गरेको थियो । मुलुककै राजनीति परिवर्तन हुँदै आउँदो फागुन २१ गतेका निम्ति प्रतिनिधिसभाको निर्वाचन मिति तोकिएको हुँदा महाधिवेशन सार्नुपर्ने देखिएको झाले बताँउनु भयो ।
पार्टीले यसअघि यही असोजभित्र वडा, कात्तिक भित्र पालिका, मङ्सिरमा जिल्ला अधिवेशन सक्दै माघ १५ सम्ममा प्रदेश अधिवेशन गरी केन्द्रीय महाधिवेशन गर्ने निर्णय लिएको थियो । झाले केही दिनअघि भएको सचिवालय बैठकमै ‘अर्लि महाधिवेशन’को प्रसंग उठाउँदै केन्द्रीय समितिको बैठकमा प्रस्ताव राख्नुपर्ने धारणा राख्नु भएको थियो । तर, पार्टीले यसबारे कुनै निर्णय लिएन ।राष्ट्रिय स्वतन्त्र पार्टी ३९ महिनाअघि गठन भएको थियो ।
