काठमाडौँ ,५ असोज। गत भदौ २३ र २४ गतेको आन्दोलनका क्रममा घाइते भएकाहरूले जेनजी आन्दोलनलाई ‘हाइज्याक’ गर्न खोजिएको भन्दै गृहमन्त्री ओमप्रकाश अर्यालको ध्यानाकर्षण गराएका हुन् । आइतबार सिंहदरबार पुगेर घाइतेहरूले गृहमन्त्रीसँग भेट गर्दै यस्तो चेतावनी दिएका हुन्।
उनीहरूले आन्दोलनका शहीद र घाइतेहरूको अपमान हुने किसिमका गतिविधि सह्य नहुने जानकारी दिएका छन् । जेनजीका विभिन्न समूहहरूले वर्तमान परिस्थितिमा सरकार समक्ष आ–आफ्नै माग राखि रहेको अवस्थामा राजनीतिक दलमा आबद्ध युवाहरूले समेत आन्दोलनको फाइदा उठाउन खोजेको भन्दै वास्तविक जेनजी पुस्ता आक्रोशित भएका छन् ।
आफूहरू नै वास्तविक जेनजी पुस्ता भएको र आन्दोलनबाट प्राप्त उपलब्धिलाई दुरुपयोग गर्न नपाइने उनीहरूले चेतावनी दिएका छन्।
