झापा,९ असोज । मेची भन्सार कार्यालयबाट चालू आर्थिक वर्ष २०८२÷८३ को पहिलो दुई महिनामा अलैँची निर्यात ४३ दशमलब ९० प्रतिशतले बढेको छ ।
कार्यालयको तथ्याङ्कअनुसार यो अवधिमा ८५ करोड ९६ लाख ११ हजार रुपैयाँ बराबरको अलैँची निर्यात भएको छ । गएको दुई महिनाको अवधिमा पाँच सय २२ मेट्रिक टन अलैँची निर्यात भएको मेची भन्सार कार्यालयका सूचना अधिकारी ईश्वरकुमार हुमागाईंले बताँउनु भयो।
आर्थीक वर्ष २०८१÷८२ को पहिलो दुई महिनाको अवधिमा ५९ करोड ७३ लाख ५२ हजार रुपैयाँ बराबरको अलैँची निर्यात भएको उहाँले जानकारी दिनु भयो। कार्यालयको तथ्याङ्कअनुसार चालू आर्थिक वर्षको दुई महिनामा चियाको निर्यात ३४ प्रतिशतले घटेको छ । यो अवधिमा ७५ करोड तीन लाख ४८ हजार रुपैयाँ बराबरको चिया निर्यात भएको हो । सूचना अधिकारी हुमागाईंका अनुसार आर्थिक वर्ष २०८१÷८२ को यही अवधिमा एक अर्ब १३ करोड ७४ लाख आठ हजार रुपैयाँ बराबरको चिया निर्यात भएको जानकारी पाइएको छ ।
भन्सार कार्यालयको तथ्याङ्कअनुसार निर्यात हुने मुख्य वस्तुहरूमा छुर्पी ९८ दशमलब ३० प्रतिशत, काउली, ब्रोकाउली र बन्दागोपी १५५ दशमलब २० प्रतिशत, भेनियर सिट ७४ प्रतिशत, मुसुरो दाल ६५५ दशमलब १० प्रतिशतले वृद्धि भएको छ । यसैगरी फलामे पाता ९३ दशमलब ४० प्रतिशत, अदुवा ४१ दशमलब ८० प्रतिशत र अम्रिसो ३० दशमलब१० प्रतिशतले कमी आएको सूचना अधिकारी हुमागाईंले बताँउनु भयो। मेची भन्सारबाट चालू आर्थिक वर्षको दुई महिनामा तीन अर्ब ६ करोड ३७ लाख ३९ हजार रुपैयाँको मालवस्तु निर्यात भएको जानकारी पाइएको छ ।
