काठमाडौँ,९ असोज । जेनजी आन्दोलन पछि प्रमुख दलहरुमा नेतृत्व हस्तान्तरण र पार्टी पुर्न संरचनाको बहस चलिरहेको बेला मधेस केन्द्रित दलहरुमा भने एकताको चर्चा सुरु हुन थालेको छ ।
उपेन्द्र यादव नेतृत्वको जनता समाजवादी पार्टी नेपाल, महन्थ ठाकुर नेतृत्वको लोकतान्त्रिक समाजवादी पार्टी नेपाल, राजेन्द्र महतो नेतृत्वको राष्ट्रिय मुक्ति पार्टी नेपाल र रञ्जिता श्रेष्ठ नेतृत्वको नागरिक उन्मुक्ति पार्टीले एकताका लागि आन्तरिक छलफल सुरु गरेका हुन्। यादव, ठाकुर र महतोबिच पनि यस विषयमा कुराकानी भइरहेको स्रोतले जनाएको छ ।
लोसपा नेपालका उपाध्यक्ष लक्ष्मणलाल कर्ण मधेस केन्द्रित दलहरुबिच एकताको विकल्प नरहेको जनाँउनु हुन्छ । उहाँका अनुसार यस विषयमा अनौपचारिक छलफल चलेको भएपनि त्यसले मूर्तरुप भने छठ पछि पाउन सक्ने छ ।
‘जेनजी पुस्ताको आन्दोलनले हरेक राजनीतिक दललाई जरैदेखि हल्लाइदि रहेको छ । पार्टीहरु नयाँ स्वरुपमा नगए कुनै दलको कल्याण हुँदैन,’ उहाँ भन्नु हुन्छ्, ‘पार्टी एकीकरण गरेर नयाँ पुस्तालाई पार्टी हस्तान्तरण गरेर पुराना नेताहरु अभिभावकको भूमिकामा रहेर दिशानिर्देश गर्नुपर्छ ।‘
तत्काल एकता सम्म जान नसकिए मोर्चा कसिलो बनाउनुपर्ने उहाँले बताँउनु भयो । आगामी चुनाव अहिलेका दलहरुका लागि निकै चुनौतीपूर्ण रहेकाले समयमै आफूलाई रुपान्तरण गर्न सके राम्रो हुने उहाँले बताँउनु भयो।
जसपा नेपालका महासचिव रामकुमार शर्मा असोज ५ गते बसेको कार्यकारिणी समितिको बैठकले पनि विचार र मुद्दा मिल्ने राजनीतिक दलहरुसँग एकता वा कार्यगत एकता गर्ने निर्णय गरेको बताँउनु हुन्छ। त्यसका आधारमा दलहरुसँग अनौपचारिक छलफल सुरु भएको उहाँले स्वीर्कानु भयो।
