काठमाडौं,११ असोज। नेकपा एमालेका अध्यक्ष केपी शर्मा ओलीले देशको अर्थतन्त्र असहज अवस्थामा गुज्रिएको बेला एमालेको सरकार बनेको बताँउनु भएको छ । राष्ट्रिय युवा संघ नेपालले आयोजना गरेको शुभकामना आदानप्रदान कार्यक्रमलाई सम्बोधन गर्दै उहाँले एमालेको नेतृत्वमा सरकार बनेपछि अर्थतन्त्र सबल भएको र विकासका कामले तीब्रता पाएको दाबी गर्नु भएको छ।
उहाँले सुशासन र विकासमा एमालेले ध्यान केन्द्रित गरेको उल्लेख गर्दै मनमोहनको पालादेखि २०७४ र अहिले पनि सरकारमा जाँदा धेरै राम्रा काम गरेको बताउनु भयो।
पूर्वप्रधानमन्त्री ओलीले भ्रष्टाचार उन्मूलन नभएपनि आफ्नो पालामा भ्रष्टाचार नियन्त्रण भएको दाबी गर्दै जनतालाई सेवा सुविधा दिनुपर्छ भन्ने कुरामा सदैव जोड दिएको बताउनु भयो।
उहाँले देशभक्ति र देशको पक्षमा बोल्दा झोले भन्ने ट्रेन चलाइएको भन्दै आपत्ति जनाउनु भएको छ। उहाँले राष्ट्रको हितको पक्षमा उभिदा विरोधीहरु सल्बलाएको धारणा राख्नु भयो।
