दमक, असोज १२ । दमकस्थित सूर्यदर्शन सहकारी संस्था लिमिटेडले सामाजिक उत्तरदायित्वप्रति संवेदनशीलता देखाउँदै आफ्ना सदस्य तथा सर्वसाधारणलाई प्रत्यक्ष लाभ र्पुयाउने कार्यक्रमहरू सञ्चालन गर्दै आएको छ। यसै क्रममा सहकारीले हात्तीको आक्रमणमा परी ज्यान गुमाएकी सुनिता राईको परिवारलाई ५ लाख रुपैयाँको बीमा रकम प्रदान गरेको छ।
संस्थाको १६औं वार्षिक साधारणसभाको अवसरमा दमक–३ निवासी दिवंगत राईको परिवारलाई उक्त बीमा रकम हस्तान्तरण गरिएको हो। कार्यक्रममा बोल्दै अध्यक्ष टिकाराज सापकोटाले सहकारीले सदस्य मात्र नभई सम्पूर्ण समुदायलाई लक्षित गरेर जिम्मेवार भूमिका निर्वाह गर्ने प्रतिबद्धता दोर्होयाए।
यस्तै, साधारणसभाको समापन समारोहमा ७० वर्षमाथिका २० जना जेष्ठ नागरिकलाई सम्मान गरिएको थियो। प्रत्येक जेष्ठ नागरिकलाई नगद १,२०० रुपैयाँसहित सम्मान पत्र प्रदान गरिएको अध्यक्ष सापकोटाले जानकारी दिनुभयो। सूर्यदर्शन सहकारीले विगत १६ वर्षदेखि वित्तीय सेवा विस्तारसँगै सामाजिक क्षेत्रका गतिविधिलाई पनि प्राथमिकतामा राख्दै आएको छ।
