काठमाण्डौं,२० असोज। नेपाली कांग्रेसमा विशेष महाधिवेशन आह्वानका लागि केन्द्रीय समिति बैठकअघि नै महाधिवेशन प्रतिनिधिको हस्ताक्षर पेस गर्ने तयारी गरिएको छ, जसको लागि हस्ताक्षर अभियान जारी रहेको जानकारी पाइएको छ ।
४० प्रतिशत महाधिवेशन प्रतिनिधिले कारण खुलाई हस्ताक्षरसहित लिखित माग गरेमा विशेष महाधिवेशन बोलाउन सक्ने व्यवस्था विधानले गरेको जनाएको छ । सोही व्यवस्थाको उपयोग गर्दै कांग्रेसको संस्थापन इतर समूहले हस्ताक्षर अभियान चलाइ रहेको छ ।
‘२५ गते हस्ताक्षर बुझाउने तयारी रहेको छ, अहिले कलेक्सन भइसकेको छ । देशभर गरिरहेको छ । आजभोलि अझै बढी होला दसैँ लागेपछि अभियानले गति लिन सकेको थिएन,’ कांग्रेसका एक नेताले भन्नु भयो।
कांग्रेस केन्द्रीय समिति बैठकमा सभापति शेरबहादुर देउवा पक्षधरको बुहमत रहेको छ । उनीहरू नेतृत्व परिवर्तन १५औँ महाविधेशनबाट होस् भन्ने चाहन्छन् । केन्द्रीय समिति बैठकले आवश्यक ठानेर विशेष महाधिवेशन बोलाउन सक्ने विधानको व्यवस्था पालना हुन सक्दैन भने इतर समूहका नेताहरूले विशेष महाधिवेशन बोलाउन महाविधेशन प्रतिनिधिले हस्ताक्षर बुझाउने बाटो लिएका छन्।
असोज ६ बाट शेखर कोइराला तथा महामन्त्रीद्वय गगनकुमार थापा र विश्वप्रकाश शर्मा पक्षधरले हस्ताक्षर अभियान सुरु गर्नु भएको थियो। कांग्रेस केन्द्रीय समिति बैठक २६ असोजमा बस्ने भएको छ ।
