दमक, असोज २० । झापाको शिवसताक्षी नगरपालिका–१० स्थित सुकुना खोला (भालु खोला) मा डाइभर्सन निर्माण कार्य सम्पन्न भएपछि पूर्व–पश्चिम एसियन हाईवे पूर्ण रूपमा सञ्चालनमा आएको छ।
गत असोज १९ गते बिहान मर्मतको क्रममा हेम पाइपमार्फत बनाइएको अस्थायी डाइभर्सन पानीको तेज बहावले बगाएपछि सडक पूर्ण रूपमा अवरुद्ध भएको थियो। हेम पाइपको छेउको माटो कटान भएपछि सवारी आवागमन ठप्प भएको थियो।
सडक विभाग र स्थानीय निकायको समन्वयमा मर्मत कार्य तीव्र रूपमा अगाडि बढाइएपछि सोमबार बिहानदेखि दुवै तर्फको यातायात पुनः सञ्चालनमा आएको जिल्ला प्रहरी कार्यालयले जनाएको छ। सडक अबरुद्ध हुँदा केही घण्टासम्म सवारी साधन राजमार्गमा रोकिएका थिए। हाल पूर्व–पश्चिम मार्गमा सवारी आवतजावत पूर्ण रूपमा सामान्य भइसकेको प्रहरीले जनाएको छ।
