काठमाण्डौं,२३ असोज। अविरल वर्षा र पहिरोका कारण विभिन्न नौ ठाउँका सडक अझै अवरुद्ध भएका छन् । नेपाल प्रहरीका अनुसार कोशी, मेची, बीपी, पासाङ ल्हामु र कर्णाली करिडोर लगायतका सडक अझै खुल्न सकेको छैन ।
कोशी राजमार्गअन्तर्गत संखुवासभाको भोटखोला गाउँपालिका–४ बरुणखोलामा जेठ ६ गतेदेखि नै सडक पूर्णरूपमा अवरुद्ध भएको छ । यही राजमार्गकै मकालु गाउँपालिका–३ एकुवामा पनि महिना दिनदेखि पहिरोका कारण सडक बन्द रहेको प्रहरीले बताएको छ ।
मेची राजमार्ग अन्तर्गत इलामको इलाम नगरपालिका–९ राजदुवाली लगायतका ठाउँमा वर्षाका कारण सडक पूर्ण रूपमा अवरुद्ध बनेको छ । पाँचथरको तुम्वेबा गाउँपालिका–२ नावाखोलामा पनि अविरल वर्षाले सडक अबरुद्ध भएको छ । रसुवाको गोसाईकुण्ड गाउँपालिका–२ मा तीन ठाउँमा पहिरो खस्दा पासाङ ल्हामु राजमार्ग अवरुद्ध भएको हो ।
बीपी राजमार्ग अन्तर्गत काभ्रे र सिन्धुलीका विभिन्न ठाउँमा सडक पूर्ण रूपमा बन्द भएको छ । काभ्रेको रोशी गाउँपालिका–११ माम्तीखोला लगायत तीन ठाउँमा पहिरोले सडक अवरुद्ध गरेको छ भने सिन्धुलीको सुनकोशी गाउँपालिका–१ नेपालथोकमा पनि सडक बन्द भएको छ ।
पश्चिममा कर्णाली करिडोर अन्तर्गत हुम्लाको खार्पुनाथ गाउँपालिका–५ करिल्ला र कालिकोटको पचालझरना गाउँपालिका–८ जुगेनी खोलामा पनि पहिरोका कारण सडक पूर्ण रूपमा अवरुद्ध भएको प्रहरीले बताएको छ । लगातारको वर्षाका कारण सडक बन्द हुँदा गाडी आवतजावतमा समस्या भएको प्रहरीले जानकारी दिएको छ।
