काठमाडौँ,२३ असोज । सञ्चार तथा सूचना प्रविधि मन्त्री जगदीश खरेलले बदलिँदो विश्वव्यापी परिवेशमा हुलाक सेवाको आवश्यकता झनै बढेको बताउनु भएको छ । १५१ औँ विश्व हुलाक दिवसका अवसरमा हुलाक सेवा विभागले बिहिबार आयोजना गरेको कार्यक्रममा उहाँले हुलाक सेवालाई समयानुकूल सुधार गर्दै लैजानुपर्नेमा जोड दिनु भएको छ ।
‘हुलाकको आवश्यकता र सार्थकता घटेको छैन’, मन्त्री खरेलले भन्नु भयो,‘हुलाक सेवालाई आधुनिक, प्रतिस्पर्धी र व्यावसायिक बनाउनुपर्छ ।’ सरकार हुलाक सेवाको व्यावसायिकीकरण गर्ने पक्षमा रहेको उल्लेख गर्दै उहाँले यसबाट मात्रै हुलाक सेवाको विश्वव्यापी पहुँच अभिवृद्धि गर्न सकिने बताउनु भयो ।
‘स्थानीय तह र समुदाय, परिवार र व्यक्तिको तहसम्म हुलाक सेवा पु¥याउनुपर्छ । विश्वको जुनसुकै देशमा रहेका नेपालीका बीचमा हुलाक सेवाको पहुँच हुनुपर्छ’, मन्त्री खरेलले भन्नु भयो । उहाँले हुलाक सेवालाई सुदृढ बनाउन मन्त्रालय सदैव सकारात्मक रहेको उल्लेख गर्नु भयो।
सो अवसरमा मन्त्री खरेलले नेपाली क्रिकेट टोली (महिला र क्वालिफाइड यु–२०), महोत्तरीको महिटहानीस्थित लक्ष्मीनारायण मन्दिर, मुस्ताङको लोमान्थाङस्थित सिजा झोङ गुफा र शिक्षाविद् डा. हर्कबहादुर बुढामगरको तस्बिर अङ्कित टिकटमा टाँचा लगाउनु भएको छ् ।
कार्यक्रममा ‘फिलाटेलिक’, उत्कृष्ट कर्मचारीलगायतलाई सम्मान गरिएको थियो । दिवसका अवसरमा विभाग परिसरमा विभिन्न हुलाक टिकट प्रदर्शन गरिएको थियो भने ‘नागरिकका लागि हुलाक, स्थानीय सेवा र विश्वव्यापी पहुँच’ भन्ने नाराका विश्वव्यापी रूपमा बिहिबार विश्व हुलाक दिवस मनाइँदैछ ।
