काठमाडौँ,२४ असोज । त्रिभुवन विश्वविद्यालय शिक्षण अस्पताल (टिचिङ) ले आफ्ना चिकित्सकहरूलाई बिरामीलाई ‘जेनेरिक’ औषधि अनिवार्य रूपमा ठुला (क्यापिटल) अक्षरमा लेखेर सिफारिस गर्न निर्देशन दिएको जनाएको छ ।
अस्पतालमा औषधि सिफारिस गर्दा अब डाक्टरहरूले क्यापिटल लेटर वा ठुला अक्षरमा लेख्नुपर्ने भएको हो । यो निर्णय डाक्टरहरूले हतारमा लेख्दा औषधिको नाम बुझ्न गाह्रो हुने, बिरामीको स्वास्थ्यमा जोखिम आउने र फार्मेसीलाई पनि औषधि चिन्ने समस्या हुने भएकाले यस्तो निर्देशन दिएको अस्पतालका सूचना अधिकारी कालीप्रसाद रायले बताउनु भयो ।
यसले गर्दा डाक्टरहरूलाई औषधि लेख्न अलि बढी समय लाग्ने भए पनि, बिरामीले सही औषधि पाउने र समग्रमा स्वास्थ्य सेवा प्रणालीमा सहजता आउने उहाँको भनाइ छ ।
अस्पतालमा कार्यरत सम्पूर्ण चिकित्सक शिक्षकहरूलाई नेपाल सरकार तथा डीन कार्यालयबाट निर्देशित नियम अनुसार बिरामीलाई औषधि सिफारिस गर्दा ‘जेनेरिक’ नाम ठुला अक्षरमा लेख्न निर्देशन दिएको उहाँले बताउनु भयो ।
‘टिचिङ अस्पतालमा ठुलो संख्यामा बिरामी उपचारका लागि आउने भएकाले डाक्टरहरू कामको प्रेसर हुन्छन्, ।’ उहाँले भन्नु भयो, ‘कहिलेकाहीँ हतारमा औषधि प्रेकिप्सन गर्दा फामेर्सीवालालाई औषधिको नाम बुझ्न समय लाग्न सक्छ त्यसैले क्यापिटल लेटर लेखन भनिएको हो ।’
टिचिङ अस्पतालमा दैनिक ओपिडीमा दैनिक २५०० देखि ३००० बिरामी आउँने गर्द छन् । आकस्मिक (इमरजेन्सी) कक्षमा दैनिक १५५ देखि १६० जना बिरामी उपचारका लागि आउने र्गछन् ।
