दमक, २१ पुस । कोशी प्रदेश सरकार सामाजिक विकास मन्त्रालय, स्थानीय तहहरू र करुणा फाउण्डेसन नेपालको त्रिपक्षीय लागत साझेदारीमा अपाङ्गता रोकथाम तथा पुनःस्थापना कार्यक्रम अन्तर्गत अपाङ्गता भएका बालबालिकालाई लक्षित हुइलचेयर नाप जाँच तथा वितरण कार्यक्रम दमकमा सम्पन्न भएको छ। राष्ट्रिय अपाङ्ग महासंघको प्राविधिक सहकार्यमा सञ्चालन भएको उक्त कार्यक्रम २०८२ साल पुस २१ गते झापाको दमकमा आयोजना गरिएको हो।
कार्यक्रममा अपाङ्गता भएका बालबालिकाको आवश्यकता अनुसार हुइलचेयरको नाप लिइएको तथा वितरण प्रक्रिया अगाडि बढाइएको आयोजकले जनाएको छ। बालबालिकाको सहज आवागमन र दैनिक जीवनलाई सरल बनाउने उद्देश्यले कार्यक्रम सञ्चालन गरिएको हो। कार्यक्रमका प्रमुख अतिथि कोशी प्रदेशका मुख्यमन्त्री हिकमत कुमार कार्कीले अपाङ्गता भएका नागरिकको जीवनस्तर सुधार प्रदेश सरकारको प्राथमिकता रहेको बताउनुभयो।
उहाँले सरकारी, गैरसरकारी तथा अन्तर्राष्ट्रिय सहयोगको समन्वयमा यस्ता कार्यक्रमलाई निरन्तरता दिइने प्रतिबद्धता जनाउनुभयो। कार्यक्रममा हुइलचेयर फर किडस ले सहयोग गरेको थियो भने कोशी प्रदेश सरकार सामाजिक विकास मन्त्रालय विराटनगर तथा प्रदेशका विभिन्न स्थानीय तहहरूको सहकार्य रहेको थियो। कार्यक्रमको आयोजन करुणा फाउण्डेसन नेपालले गरेको हो।
