काठमाडौँ,२५ पुस । विकास उप्रेती अध्यक्ष रहेको गैरआवासीय नेपाली सङ्घ, राष्ट्रिय समन्वय परिषद् अमेरिकाले युवा तथा खेलकुद मन्त्री बब्लु गुप्तालाई अमेरिका भ्रमणमा बोलाएको जनाएको छ ।
एक विज्ञप्ति जारी गर्दै परिषद्ले भनेको छ– ’युवा तथा खेलकुद मन्त्री केवल नेपाल सरकारका एक सदस्य मात्र नभई, विदेशमा बसोबास गर्ने नेपाली युवासहित सम्पूर्ण नेपाली समुदायका साझा मन्त्री हुनुहुन्छ । गैरआवासीय नेपाली सङ्घ नेपाली डायस्पोरालाई प्रतिनिधित्व गर्ने संस्था भएको नाताले नेपालको बदलिँदो राजनीतिक(सामाजिक परिस्थिति तथा पछिल्लो जेनजी आन्दोलन पश्चात् उत्पन्न राष्ट्रिय अवस्था र सम्भावनाहरूको सन्दर्भमा, नेपाल सरकारमा जेनजीको प्रतिनिधित्व गर्दै युवा तथा खेलकुद मन्त्रीको जिम्मेवारी सम्हाल्नुभएका माननीय बब्लु गुप्ता ज्यूलाई नेपाली समुदायसँग अन्तरक्रिया गर्न औपचारिक रूपमा आमन्त्रण गरिएको हो ।’
उक्त कार्यक्रममा सहभागी हुनका लागि लाग्ने सम्पूर्ण खर्च आयोजक संस्थाले नै व्यहोर्ने निर्णय गरिएको छ, जसबाट नेपाल सरकार वा राज्यलाई कुनै पनि प्रकारको आर्थिक व्ययभार नपर्ने पनि विज्ञप्तिमार्फत प्रस्ट पारिएको हो । गुप्ताको अमेरिका भ्रमणलाई लिएर उठेका टीकाटिप्पणीहरूप्रति ध्यानाकर्षण भएको भन्दै परिषद्ले भ्रममा नपर्न सम्पूर्णमा आग्रह गरेको हो ।
यसअघि गैरआवासीय नेपाली सङ्घ अमेरिकाले नेपाल सरकारका युवा तथा खेलकुद मन्त्री बब्लु गुप्तालाई अमेरिकामा कुनै पनि कार्यक्रमका लागि आमन्त्रण नगरेको प्रस्ट पारेको थियो ।
