दमक,२९ पुष । दमक नगरपालिकाले क्षयरोगको समयमै पहिचान र नियन्त्रणलाई लक्षीत गर्दै क्षयरोग सक्रिय खोजपड्ताल अभियान २०८२ अन्तर्गत निःशुल्क क्षयरोग परीक्षण शिविर सञ्चालन गरेको छ ।
दमक नगरपालिका–३ मा आयोजना गरिएको शिविरमा अत्याधुनिक एआई प्रविधिमा आधारित एक्स–रे सेवामार्फत क्षयरोग परीक्षण गरिएको हो। शिविर दमक नगरपालिकाको स्वास्थ्य शाखाको आयोजनामा तथा बागमती सेवा समाज नेपालसँगको सहकार्यमा वडा नं ३ स्थित आधारभूत स्वास्थ्य केन्द्रमा सम्पन्न भएको हो।
शिविरमा सहभागी स्थानीय नविन भण्डारीका अनुसार वृद्धवृद्धादेखि बालबालिकासम्मलाई लक्षित गरी आफ्नै टोलमै निःशुल्क स्वास्थ्य सेवा उपलब्ध हुँदा धेरै सहज भएको छ। यस्ता शिविरहरू नियमित रूपमा समुदायमा सञ्चालन हुनुपर्ने उहाँको भनाइ छ।
त्यस्तै, अर्की सहभागी पासाङ चोमु शेर्पाले अन्य स्थानमा परीक्षण गराउँदा रिपोर्ट आउन समय लाग्ने भए पनि एआई प्रविधिको प्रयोगले आफ्नै ठाउँमै छिटो र सहज रूपमा परीक्षण सम्भव भएको बताउनुभयो।
आयोजकका अनुसार एआई प्रणालीमार्फत छातीको क्षयरोग परीक्षण गर्ने यस्तो मेसिन कोशी प्रदेशमै एउटा मात्र रहेको छ। शिविरबाट जम्मा ३३२ जनाले सेवा लिएका छन् भने ३२ जनामा थप उपचार आवश्यक देखिएको वडा नं ३ नगर स्वास्थ्य केन्द्रका इन्चार्ज देवी प्रसाद काफ्लेले जानकारी दिनुभयो।
यस अभियानले क्षयरोग अन्त्यका लागि सामूहिक प्रतिबद्धता, लगानी र प्रभावकारी सेवा प्रवाह आवश्यक रहेको सन्देश दिएको स्वास्थ्य शाखाले जनाएको छ। शाखाले क्षयरोग लुकाएर नराख्न, शंकास्पद लक्षण देखिएमा तुरुन्त परीक्षण गराउन र उपचार पूरा गर्न सबैलाई आग्रह गरेको छ।
